Open Days: incuntada a Bruxelles, Theiner sön la macroregiun alpina
Al vëgn organisé dötaurela i Open Days 2015 a Bruxelles, na fujina de barat d’informaziuns y d'idees danter les istituziuns europeiches, statales y regionales por l’atuaziun di programs finanziá dal’UE. La strategia por la macroregiun alpina (EUSALP) é stada tl zënter de na scomenciadia organisada incö (14/10) dal’Euregio Tirol-Südtirol-Trentin á chëra che al á ince tut pert l’assessur Theiner.
La Comisciun europeica á metü a jí adöm al Comitê dles Regiuns la 13ejima ediziun dl’Edema europeica dles regiuns y dles cités – Open Days 2015. Aladô dl moto „Regiuns y cités d’Europa: partners por i investimënc y la chersciüda“ él sön le program cina ai 15 d’otober a Bruxelles indöt 100 seminars y debatüdes. Danter i partezipanc ai Open Days él ince l’Euregio Tirol-Südtirol-Trentin che á organisé n’incuntada por aprofondí les tematiches dla cooperaziun transfrontaliera y dla Strategia europeica por la macroregiun alpina (EUSALP). Al’incuntada publica ál tut pert, dlungia i rapresentanc dl Südtirol, Trentin y Tirol, sciöche ince reladus dal Paiern, dala Val d’Aosta, dal Piemot, dal Kärten, dal Salzburg, dal Vorarlberg, dales regiuns franzejes Rhône-Alpes, Auvergne y Provence-Alpes-Côte d'Azur.
La strategia alpina é stada la tematica zentrala che é gnüda debatüda da reladus dla politica y dl’economia dles Regiuns interessades dan da n publich de 100 partezipanc. Por la Provinzia de Balsan ál tut pert le vizepresidënt Richard Theiner, competënt por le svilup dl teritore, ambiënt y energia, che á presenté les pratiches dl Südtirol tl setur dl’efiziënza energetica, sciöche por ëjempl la strategia dla CiasaClima, „cun chëra che al é sté poscibl da realisé na strategia energetica efiziënta cun la partezipaziun dla popolaziun zënza messëi fá mosöres legislatives.“ L’assessur por l’energia á sotligné inant che la macroregiun alpina „á les poscibilités por se svilupé inant sciöche n model por les atres regiuns por ejëmpl pro l’efiziënza energetica y le bilanz energetich valif ince tres les fontanes de energia renovables".
Les 100 incuntades di Open Days 2015 (preodüdes 6mile partezipanc) é partides sö te trëi arees tematiches: modernisé l’Europa, Regiuns davertes al comerz y le svilup dles zones rurales y dles cités.
rc
Galaria dales fotografies
