Turism, vari inant tl vers de na reorganisaziun dl setur
Le percurs de reorganisaziun dl setur dl turism dla Provinzia de Balsan vá inant. Incö (ai 15 d’otober) s’ál incunté le comitê de coordinamënt a Balsan adöm al presidënt dla Provinzia Arno Kompatscher. La tematica prinzipala é stada la restrotoraziun dl'organisaziun provinziala dles assoziaziuns turistiches.
Le presidënt Arno Kompatscher á sotligné incö (ai 15 d’otober) tratan l’incuntada cun i rapresentanc dl LTS (Assoziaziun dles organisaziuns turistiches), dl’Uniun di Osć y Ostis (HGV) y dla SMG che "les aziëndes locales dl turism sará ince tl dagní n punt de forza prinzipal dla strategia provinziala tl setur dl turism", mo al á ince injunté che "n valgönes realtés ne á nia les dimenjiuns nezesciares por ademplí a na seria de compic, y porchël ares debojëgn de n sostëgn particolar". Le proiet de reorganisaziun prevëiga che sön dorada mesana dessél gní cherié de plü unités regionales de management (RME) che jará a baraté fora les assoziaziuns atuales, mo al resta ciamó n valgügn punc da stlarí: dal numer de chëstes unités ala definiziun avisa dl raiun de competënza. "I orun renforzé ciamó deplü la destinaziun turistica Südtirol – á prezisé Kompatscher – y nosc obietif é chël da avëi n laur ciamó plü efiziënt y unitar".
"La reforma – á ajunté le presidënt dl’Uniun di Osć y Ostis Pinzger – messará garantí n renforzamënt dla posiziun dles zones beles stersces söl marcé, fajon ince a na manira che les perts manco presëntes pois mioré süa situaziun". L’idea é chëra che cherié unités regionales zënza na posiziun iuridica definida te na manira tlera, mo che laores ma tl setur dl marketing regional por mët adöm na rëi de assoziaziuns cun n lian dër sterch l’öna cun l’atra. "Les competëzes sura les dezijiuns che reverda programs, obietifs y personal – á sotligné le presidënt Kompatscher - restará pro i rapresentanc dles assoziaziuns turistiches al intern dles RME nöies, che messará ciamó gní definides por ci che reverda sides les competënzes co l’organisaziun interna." De chësta definiziun, sciöche ince dl’assegnaziun y dla spartiziun dles ressurses finanziares, se fistidiará n grup de laur metü adöm ad hoc.
Le presidënt dl LTS, Ambros Hofer, á definí l’incuntada da incö (ai 15 d’otober) a Balsan "positiva y costrutiva", cun la contlujiun dl presidënt dla Provinzia che sotlignëia che "l’obietif prinzipal é chël da renforzé la posiziun dl martl Südtirol. Por arjunje chësc fin él nezesciar da lauré cun ciamó plü profescionalité tl marketing regional, da adoré al miú les sinergies danter turism y produc de cualité y da elaboré na reforma strotorala che mëtes a desposiziun plü ressurses finanziares propi por chësc fin."
rc
Galaria dales fotografies
Foto USP/mb
Foto USP/mb
