Migranc: dui termins cun film y leteratöra tla biblioteca Teßmann
Al tema dla migraziun ti dedichëia la biblioteca provinziala Teßmann da Balsan dui apuntamënc. En vëndres ai 23 d’otober sarál da odëi le film „Io sto con la sposa“, premié plü iadi a Aunejia, y en sabeda ai 24 d’otober gnarál presenté de plü publicaziuns y auturs dla leteratöra africana y asiatica.
En vëndres, ai 23 d’otober dales 20.00 gnarál mostré tla biblioteca provinziala Teßmann tla strada via Diaz 8 a Balsan le film de Antonio Augugliaro, Gabriele Del Grande y Khaled Soliman Al Nassiry "Io sto con la sposa", premié plü iadi tl 2014 ala Mostra dl’cinema de Aunejia. Le film cunta la storia (sozedüda veramënter) de n scritur palestinesc-sirian y n jornalist talian che incunta a Milan cin' profugs dala Palestina y dala Siria che é rová tla Talia cun la barca cina Lampedusa. Ai tol la dezijiun da daidé i profugs sön so iade zënza documënc por rové tla Svezia. Por ne gní nia arestá mëti a jí na noza finta pro chëra che na süa amica dala Palestina se vista sö da novicia y n valgügn d'atri amisc talians y sirians savaia da ester da noza. Insciö scomëncia por le grup n iade tres mesa l'Europa che döra cater dis. Al é na storia sozedüda veramënter sön strada danter Milan y Stockholm. L’evënt é organisé dala Teßmann.
En sabeda, ai 24 d’otober dales 09.00 ales 14.00 mët la Biblioteca Provinziala Teßmann, en gaujiun dl De dles biblioteches, tl zënter les porsones che á lascé süa patria y che se chir sëgn n daciasa nü tl Südtirol o che l'á bele ciafé. Insciö vëgnel tut chësc de sciöche ocajiun por n'incuntada cun la leteratöra de paisc sciöche l'Egit, l'Irak, l Pakistan o la Nigeria, mo dantadöt por incunté porsones che é gnüdes da chisc posć chiló da nos. D'otober s'á zitadines "nöies" y zitadins "nüs" metü adöm deboriada cun porsones dl post te partenariac de letöra. Ares/Ai presentëia libri de sü paisc d'origina - y cunta lapró ince n pü' de valch sura se instësc.
Le De dles Biblioteches é ince le scomenciamënt de n proiet bibliotecar de döta la provinzia. Artistes y artisć dl Südtirol á realisé chertes sön le tema di preiudizi, che é da ciafé sciöche sëgnaliber te dötes les biblioteches. An pó cöie adöm chisc sëgnaliber desvalis deache vigni mëis vëgnel fora na cherta nöia. Lapró él n calënder da parëi: an pó taché les chertes lassura y injunté n valgügn pinsiers personai. Chësta aziun é n invit da se dé jö personalmënter por n ann intier cun chësta tematica.
Le program prevëiga dales 09.00 l’esposiziun di libri, dales 10.00 la presentaziun di libri y na discusciun, dales 11.30 „Displaced Positions“, cun i artisć che baia di preiudizi sön la migraziun. La scomenciadia dla biblioteca provinziala Teßmann é organisada en colaboraziun cun la Caritas dla diozeja y cun le Sorvisc de coordinamënt por l’integraziun dla Provinzia.
rc
Galaria dales fotografies
