BBT: inant cun la trassa d’azes Fortezza-Pruca, proiet al CIPE
Vari inant por les trasses d’azes dl proiet dl tunel de basa dl Prener (BBT): a Roma á RFI, gestur dla rëi dla ferata, dé jö al Ministere dles infrastrotöres y di trasporc le proiet definitif por la trassa d’azes Fortezza-Pruca. A chësta moda vëgnel metü da jí l'iter d’autorisaziun dl CIPE.
Paralelamënter ala realisaziun dl tunel de basa danter Fortezza y Desproch (tl Südtirol é i laurs bele gnüs assegná o é tla fasa d’aiudicaziun, 40 km de tunel bele ciavá), á la Provinzia dagnora araté prioritaria ince la realisaziun dles trasses d’azes. Danter Fortezza y Pruca él preodü dui arlungiamënc di tuní de basa; la responsabilité de süa costruziun n’é nia dla sozieté BBT SE mo dl gestur dla rëi dla ferata taliana RFI.
Al é gnü fat sëgn n vare important: l'ad de RFI, Maurizio Gentile, ti á dé jö al Ministere dles infrastrotöres y di trasporc le proiet definitif dla trassa, elaboré da RFI y Italferr. Al vëgn metü a jí la prozedöra d’autorisaziun dl CIPE y la valutaziun di Ministeri cun la Provinzia y i Comuns interessá. Le presidënt Arno Kompatscher ó lauré cun les aministraziun locales por arjunje le miú resultat poscibl cun d’atri intervënc.
Le proiet dla trassa Fortezza-Pruca prevëiga dui tuní indolater, le pröm de 15 km da Fortezza ala fermada de Funes, la secunda de 6 km da Funes a Pruca. "Al passará sides ferates por marcianzia che ferates por passejiers, cun n mioramënt dla cualité dl ambiënt y de vita aper dla Val d'Isarch", sotrissëia Kompatscher. Le tëmp de realisaziun dla trassa d’azes, n iade stlüt jö l'iter d’autorisaziun, é de incër 7 agn. An ó mëte man i laurs dl 2018, tignin cunt dles tomanzes de lege, por stlü jö la trassa adöm cun le tunel de basa. I cosc é de 1,7 miliarg de euro.OSP
