Museum Ladin: Batadú a San Martin y domisdé por i mituns a San Ciascian
En domënia, ai 25 d’otober organisëia le Musem Ladin Ciastel de Tor n torneo de batadú a San Martin de Tor y n domisdé cun ativités por mituns y gragn cun entrada debann tl Museum Ladin Ursus Ladinicus a San Ciascian.
Le gran batadú é oramai na data tradizionala por stlü jö la sajiun da d’isté da pert dl Museum Ladin Ciastel de Tor. Chësc ann gnará la scomenciadia de aorela cörta organisada en domënia ai 25 d’otober en colaboraziun cun i Stödafüch da San Martin. Dales 13.30 vëgnel tut sö les iscriziuns y formé les scuadres. Dales 14.00 mëtel spo man le batadú. Por düc i interessá él ince poscibl da se scrí ite bele danfora al nr. 339 7685970.
Tres en domënia ai 25 d’otober mët a jí le Museum Ladin Ursus ladinicus da San Ciascian n domisdé por pici y gragn. Sön le program él plü ativités creatives por mitans y mituns y n rode acompagné por i adulc tl Museum cun n paleontologh por descurí la storia dla laurs „Ursus ladinicus“ de Conturines. L’entrada é debann cun ativités dales 14.15 ales 15.45 y dales 16.15 ales 17.45.
Cun chëstes döes manifestaziuns stlüj jö le Museum ai 31 d’otober ince chësc ann süa sajiun da d’isté pro daurí indô les portes ai 26 de dezëmber dl 2015. Por düc i interessá resta inant daverta la mostra „1914-1918 Al de là da vigni confin. I Ladis i conta sua storia“ cina ai 31 d’otober y spo dai 26/12 inant. Por plü informaziuns: www.museumladin.it (tel. 0474 / 524020).
rc
