Svilup linguistich tla scolines: Prejentazion dl’analisa ai 28/10 a Urtijëi
Per avëi na basa scientifica dla cunescënza dl ladin, tudësch y talian tl scuté su y tl ntendër di mutons dla scolines à la Intendënza ladina metù a jì adum ala Università de Persenon na evaluazion dla situazion atuela. N ressumé di resultac dl svilup linguistich di mutons y dla mutans dl ultimo ann tla scolines ladines uniral prejentà ai 28/10 dala 16.00 a Urtijëi. Duc i interessei ie inviei.
L Servisc per l’evaluazion à nvià via deberieda cun l ntendënt Roland Verra, la ispetëura dla scolines Edith Ploner, l prufessëur Rico Cathomas dl’Università de Persenon/Facultà Scienzes dla Furmazion y l’esperta tl ciamp dla scolines y dl’analisa linguistica a livel de Südtirol Irene Girotto l’evaluazion tla scolina "Analisa linguistica dl ladin, tudësch y talian tl scuté su y tl ntënder", coche evaluazion y proiet pilot a livel scientifich y prufesciunel.
L gran ubietif de chësta evaluazion fova y ie chël de documenté y de analisé per l prim iede la situazion atuela dl svilup linguistich di mutons y dla mutans dl ultimo ann tla scolines ladines tla trëi rujenedes: ladin, tudësch y talian. N à cris ora doi scolines, una per valeda cun n cuntest plutosc valif y belau l medem numer de partezipanc y de partezipantes, acioche l’analisa sibe senificativa, se tenian a un n ciamp dla cumpetënzes linguistiches: l scuté su y l ntënder.
L scuté su y l ntënder ie, mo dan l rujené, l liejer y l scrì, la fundamënta de duta la cumpetënzes linguistiches. Per nrescì chësc iel unì laurà ora aposta proes linguistiches adatedes al mut y ala muta, aldò de criters spezifics per la scolines, nsci da avëi n cheder cuncret dla perzezion dl lingaz adurvà.
Do l salut da pert dl assessëur Florian Mussner y dl ntendënt Roland Verra prejenterà l prufessëur Rico Cathomas, l’esperta tl ciamp dla scolines Irene Girotto y la dirijënta dl Servisc per evaluazion dla scoles y dla scolines Rosa Maria Mussner n ressumé di resultac de majera mpurtanza
n mierculdi, ai 28 de utober 2015,
dala 16.00,
tla direzion dla scolines “Salieta”,
a Urtijëi.
Duc i interessei ie inviei a tò pert ala prejentazion di resultac.
USP
