Dala Junta: Le statut dl’aziënda unica cun EOS, TIS; BLS, SMG é gnü aprové
Dal 2016 inant deventará operativa tl Südtirol l’aziënda speziala nöia che é nasciüda dala fujiun danter cater fornidus locai de sorvisc tl ciamp economich: BLS, EOS, SMG y TIS. Incö á la Junta provinziala aprové l’istituziun dl’aziënda speziala nöia y so statut.
Dal 1. de jená dl 2016 inant gnará l'economia dl Südtirol sostignida da n’aziënda speziala nöia che fajará da fujiuna d’idees por les aziëndes locales y ciarará da fá deventé le Südtirol n sit economich ciamó plü competitif. L’aziënda nöia nasc dala fujiun di 4 fornidus locai de sorvisc tl ciamp economich: Business Location Südtirol-Alto Adige (BLS), Organisaziun por l'esport Südtirol (EOS), Südtirol Marketing (SMG) y TIS Innovation Park. Incö, mertesc ai 20 d'otober, á la Junta provinziala aprové l’istituziun dl’aziënda speziala che vëgn dal’agregaziun de EOS-BLS-SMG-TIS y so statut.
Le statut stabilësc danterater les inciaries dl’aziënda nöia, danter chisc la promoziun dl’inovaziun y dl’inrescida, ciaran da favorí produc y prozesc inovatifs; la promoziun dles esportaziuns, dles venüdes y le retlam de produc dl Südtirol sön i marciá nazionai y internazionai cun lapró dötes les scomenciadies por ester bugn da mëte pe y se slarié fora sön i marciá; le svilup y la defujiun dla localisaziun economica Südtirol tres la promoziun teritoriala, l’assistënza dles aziëndes interessades da se lascé jö o investí tl teritore provinzial, l’acompagnamënt dl insediamënt de aziëndes te seturs strategics por le Südtirol; le svilup y la gestiun dl marketing de destinaziun a livel provinzial, dla merscia tët y dla merscia de cualité tres ativités adatades y scomenciadies de comunicaziun.
I organs dl’aziënda nöia é l’Adunanza di ënc proprietars (Provinzia 60 porcënt y Ciamena de comerz 40 porcënt), le Consëi d’aministraziun che nominëia le diretur, le Presidënt dl CdA y le Collegiun di revisurs di cunc. L’Aziënda unica gnará sostignida da plü Comités de consulënza cun rapresentanc dles assoziaziuns di seturs desvalis cun la funziun da sostigní l’atuaziun di programs anuai y por presenté propostes.
La Provinzia autonoma de Balsan y la Ciamena de comerz presentá l’aziënda nöia, l’inom dl’aziënda, l’orientamënt strategich y la strotöra dl’aziënda nöia tratan la conferënza stampa en vëndres, ai 23 d’otober dales 10.30 a Balsan cun le presidënt Arno Kompatscher, le presidënt Ebner, le diretur y i dirigënc designá.
OSP
