Dala Junta: al Conservatore Monteverdi la formaziun por maestri nüs
Le Conservatore Monteverdi de Balsan pitará dal ann academich 2015/16 inant n curs de secundo livel por la formaziun de maestri de musiga che insegna da soné n stromënt: la Junta provinziala á aprové incö, mertesc ai 20 d'otober, la deliberaziun che autorisëia l’ativaziun di cursc. I posć de stüde preodüs é 34 por todësch y 12 por talian.
Incö, mertesc ai 20 d’otober, á la Junta provinziala autorisé le Conservatore de musica „Claudio Monteverdi“ de Balsan da ativé por l’ann academich 2015/16 cursc academics de secundo livel por la formaziun didatica de maestri tla classa de concurs A077 y da pié ia ince cun les prozedöres de amisciun, ince sce chëstes ne é nia en acordanza cun le plann general statal. I posć de stüde che gnará scric fora tres na bandida sará 34 de lingaz todësch y 12 de lingaz talian. Le curs de formaziun ará na dorada de dui agn y sará la basa por ciafé l’abilitaziun al’insegnamënt da soné i stromënc tles scores dl Südtirol.
La formaziun dl personal didatich é un di compic prinzipai dl Conservatore de Balsan. Le presidënt dla Provinzia Arno Kompatscher á recordé che „por les scores mesanes y les scores de musiga é maestri motivá de importanza fondamentala, deache ai ne trasmët nia ma sües conëscenzes musicales, mo deache ai sostëgn ince la pasciun y la creativité di studënc y la scoverta de talënc nüs.“ Sön la basa dla deliberaziun aprovada incö dala Junta podará le Conservatore scrí fora les bandides por i cursc academics de formaziun di maestri.
rc
