Dala Junta: löm vërda ales bandides por la gestiun dles üties da munt
Les prömes 21 üties da munt dla Provinzia podará tosc gní assegnades tres singules gares. Cun la löm vërda da pert dla Junta provinziala ales condiziuns de partezipaziun y ai criters de cualité da respeté, pó le percurs d’assegnaziun sëgn pié ia. I contrac sará varënc dal mëis de jená dl 2016 inant.
Do na prozedöra zënza assegnaziuns l’ann passé â la Junta provinziala sotescrit tl mëis de messé n’acordanza de colaboraziun danter CAI y AVS por sostigní l’Ofize Aministraziun dl patrimone tla fasa de elaboraziun dles bandides. Incö, mertesc ai 20 d’otober, é chësc percurs de elaboraziun gnü stlüt jö y la gestiun de 21 üties da munt de proprieté dla Provinzia podará gní assegnada tosc cun la sotescriziun di contrac bele tl mëis de jená. La junta provinziala á aprové incö sides les condiziuns de partezipaziun ales bandides de concurs, co ince i criters cualitatifs da respeté por vignöna dles 21 üties da munt. La cualité sará propi n fautur important pro l’assegnaziun che podará avëi n pëis dl 80 porcënt tla valutaziun finala dla comisciun. Le 20 porcënt che resta gnará valuté aladô dla miú oferta por la Provinzia. Danter i criters de cualité plü importanc él gnü ajunté l’esperiënza tla gestiun de strotöres alpines, la conescënza dl teritore, mo ince l’esperiënza che reverda seturs dl alpinism, dl pröm aiüt y dla proteziun zivila.
La prozedöra prevëiga n contrat de basa dla dorada de trëi agn cun la proposta de arlunjamënt de d’atri trëi agn sön la valutaziun positiva dl Ofize Patrimone dla Provinzia. Indöt él preodü entrades por la Provinzia dal afit dles 21 üties de 218mile euro al ann. L’afit por la gestiun dles üties sará desfarënt da ütia a ütia sön la basa de criters sciöche l’azessibilité, les dimenjiuns, le numer de posć da dormí y di vijitadus, le contrat prevëiga che i gesturs mëss ti comuniché ala Provinzia düc i dac, a na moda che l’afit de gestiun pois gní mudé y adaté tresfora. „Te döta chësta prozedöra ará le CAI y l’AVS – insciö le presidënt Kompatscher - n rode important de consulënza, sides por ci che reverda la dezijiun sön i intervënc de ressanamënt y de manutenziun straordinara.“ Chisc intervënc gnará stabilis da na comisciun cun cater comëmbri, dui rapresentanc dla Provinzia y un a ce por le CAI y l’AVS, insciö Kompatscher. „I sá che al sará debojëgn de intervënc che costará tröp, mo les üties da munt é n simbol important de nosc raiun y i investimënc tles üties paia insciö la mëia da gní fac“, á dit le presidënt dla Provinizia che á recordé che por novëmber él preodü la bandida di concursc, por dezëmber la valutaziun dles propostes y por jená la firma di contrac.
„La dorada dles acordanzes cun la formula 3+3 – á prezisé Kompatscher – ti garantësc ai manajadus da podëi programé investimënc sön dorada lungia, y tratan l’incuntada albüda inier (19 d’otober) á dötes les perts interessades confermé la sodesfaziun por la soluziun ciafada.“ Danter les 21 üties da munt, de chëres che al vëgn scrit fora les conzesciuns (vignöna singolarmënter) él ince da ciafé la ütia de Ncisles (Santa Crestina) la ütia de Dantersasc (St. Crestina) y la ütia „Rifugio Genova“ a Funes. Al é poscibl da presenté na domanda ma por la gestiun de öna na ütia dles 21 scrites fora.
rc
Galaria dales fotografies
Foto USP/jw
