La Biblioteca Teßmann ti dedichëia na sëra al regist Ivo Barnabò Micheli
Diesc agn do la mort dl regist sütirolej ti dedichëia la biblioteca provinziala Teßmann da Balsan na sëra d’aprofondimënt ai 29 d’otober al regist de films Ivo Barnabò Micheli da Bornech. Micheli á realisé i pröms gragn films sön Pier Paolo Pasolini, Heinrich Böll y N.C. Kaser. Ala Teßmann gnarál presenté n liber y n documentar. L’entrada é debann.
Le terminn é en jöbia ai 29 d’otober dales 20.00 tla sënta dla biblioteca provinziala Teßmann (strada Armando Diaz 8) a Balsan. Joachim Gatterer y Jessica Alexandra Micheli (möta dl regist) presentará le liber „Ivo Barnabò Micheli – Poesie der Gegensätze. Cinema radicale“che ai á dé fora sura Micheli, mort avisa dan da 10 agn.
Fá films radicai orô dí por Ivo Micheli ti jí do a cosses sburlades sön na pert. Te sües stories nen vára de porsones che combat por sües convinziuns o che vá sot te so incherscimun, ara nen vá de critics dla sozieté conesciüs, mo ince de militanc por la liberté tl Eritrea zënza inom, de pëiapësc tl delta dla Donau isolé y de jënt che vir te gheti de frabic nüs desperá tla periferia de Roma.
Documënc originai, essays y tröc retrac cunta te chësc liber la biografia dl regist, che á lauré sö i traumesc personai de süa jonëza tl Südtirol te films straordinars.
Ala fin vëgnel mostré le film fat dl 2012 „Ivo Barnabò Micheli. Una Reise“ de Astrid Kofler. Te intervistes cun parënc, compagns dla jonëza y colegs de laur da tröc agn da Köln y Roma vëgnel cunté la vita y l’opera de Micheli.
Na manifestaziun dla Biblioteca provinziala Dr. Friedrich Teßmann en colaboraziun cun la ciasa edituria Folio y l’Ofize Film y media.
rc
