Separaziuns: travert dër daimpró por les mosöres de sostëgn por families
Le proiet „Families renforzades“ se dá jö dötaurela cun la tematica dla separaziun y dl devorz: l’assessuria provinziala Waltraud Deeg á debatü cun i rapresentanc dles trëi Intendënzes y dl Departimënt Sanité y politiches soziales por stabilí n program cun mosöres concretes de sostëgn te chësc setur.
La tematica dla separaziun y dl devorz é öna dles tematiches plü importantes por ci che reverda le proiet „Families renforzades“ che planifichëia ince danterater mosöres dedicades ala perioda dla gravidanza cina ai 3 agn di mituns y ala perioda dla puberté. Le proiet é gnü a se le dé sot ala direziun dl’assessuria provinziala Waltraud Deeg adöm cun les trëi Intendënzes scolastiches y cun le Departimënt por la sanité y les politiches soziales. Ala tematica dla separaziun él gnü lauré da plü de n ann cun la partezipaziun de plü auturs dl Südtirol che laora ativamënter por les families.
Le resultat é n catalogh cun mosöres che é gnüdes debatüdes dan da püch tratan n’incuntada dl grup de laur. L’assessuria Waltraud Deeg á sotligné l’importanza de na colaboraziun interdisciplinara renforzada danter düc i ënc de referimënt y les strotöres de formaziun: „Malsegurëzes y ghiranzes massa altes fej pert dla vita cuotidiana de tröpes families y la situaziun pó ince porté a situaziuns dramatiches dla separaziun o dl devorz. Ofertes d’acompagnamënt, de consulënza y de formaziun che pëia ia abonora pó renforzé la dialogh y la comunicaziun tles relaziuns danter i geniturs y mituns“, sotlignëia Deeg.
Aladô di stüdi atuai dl ASTAT él tl Südtirol un n matrimone sön cater che vëgn despartí cun vigni ann mesamënter 400 mituns sot ai 18 agn che vëgn atocá. Le grup de laur á concordé sön l’esigënza da intergní abonora por evité situaziuns de conflit: „Te chësc vers él nezesciar da avëi n’oferta de sostëgn ampla, che an pois anuzé te na manira asvelta y direta“, á dit la direturia dl Departimënt Promoziun dl stüde, cultura todëscia y integraziun Vera Nicolussi Leck. De chësta minunga é ince le diretur dla Repartiziun Politiches soziales Luca Critelli. I intendënc Roland Verra, Peter Höllrigl y l’intendënta Nicoletta Minnei á ince valuté positivamënter les mosöres preodüdes tl setur dl’educaziun y á confermé che al vëgn bele lauré dötaurela sön chëstes tematiches da pert dles Intendënzes.
La verjiun ajornada dl catalogh dles mosöres gnará analisada tratan la proscima incuntada dla rëi dles istituziuns atives tl setur dles familes che é preodüda por ai 23 de novëmber. Daldô rovará la proposta cun le pachet dles mosöres te Junta por süa discusciun y aprovaziun.
rc
Galaria dales fotografies
