Displaced Positions: 12 artisć se dá jö cun i preiudizi sön la migraziun
En domënia, ai 24 d’otober – de dles biblioteches – mët man tla Biblioteca provinziala le proiet dla biblioteca te döta la provinzia de n ann. 12 artistes y artisć dl Südtirol se dá jö cun i preiudizi sön la migraziun y laora fora na cherta postala. Les chertes é spostamënc – displacements – opiniuns corëntes dla minunga publica – positions– sön la migraziun.
Displaced Positions é n proiet dla Biblioteca Provinziala Dr. Friedrich Teßmann en colaboraziun cun le Museion, le Sorvisc de coordinamënt por l’integraziun y l’Ofize Biblioteches y letöra. 12 artistes y artisć á realisé n dessëgn sön la tematica di preiudizi tl confrunt di migranc che gnará spo publicá sön plü chertes dla posta. Vigni cherta visualisëia n spostamënt personal (displacement) de na posiziun o n punt d’odüda (position), da olache la scomenciadia á ince tut so inom.
Düc é dër bel inviá da impresté fora n liber tla biblioteca y da se tó para na cherta, che pó ince gní tuta sciöche sëgn de letöra o por se recordé da porté zoruch le liber. Vigni mëis vëgnel fora na cherta cun n‘opera nöia. Les chertes pó gní coiüdes adöm n ann alalungia y tacades sö sön na gran plata dl calënder, olache i podëis ajunté pinsiers, anotaziuns y esperiënzes. La scomenciadia é n invit da se dé jö personalmënter n ann alalungia cun chësc tema y mëte en dübe i preiudizi. Le calënder y les chertes é da ciafé debann te dötes les biblioteches che tol pert ala scomenciadia.
Chisc artisć y chëstes artistes fej para al proiet: Julia Bornefeld, Arnold Dall’O, Nicolò Degiorgis, Hannes Egger, Silvia Hell, Saman Kalantari, Brigitte Mahlknecht, Gabriela Oberkofler, Serena Osti, Simon Perathoner, Franz Pichler, Sara Schwienbacher.
La Biblioteca provinziala „Friedrich Teßmann“ á süa sënta tla strada Armando Diaz 8 a Balsan, telefon 0471 471814, E-Mail info@tessmann.it; http://www.tessmann.it/.
rc
Galaria dales fotografies
