IDM Südtirol-Alto Adige: presentada l’aziënda speziala nöia por l’economia
IDM Südtirol-Alto Adige é l’inom dl’aziënda speziala dla Provinzia y dla Ciamena dl comerz, presentada incö (23 d’otober) a Balsan, che unësc te n’aziënda unica dal 1 de jená dl 2016 inant les sozietés BLS, EOS, SMG y TIS. Le inom é n ressüme di trëi conzec che sará la basa strategica dl orientamënt dl'aziënda de sorvisc nöia por l’economia südtiroleja: Innovation, Development y Marketing.
Por le marketing dl teritore y dl turism, por l’inovaziun y le trasferimënt tecnologich y por le suport dl esport sarál tl dagní ma plü öna n’aziënda sora le partner de sostëgn por l'economia locala: la IDM Südtirol-Alto Adige. Bele l’isté dl ann passé á la Junta provinziala tut la dezijiun adöm ala Ciamena dl comerz y al Comun da Balsan da uní les cater aziëndes provinziales sot a un n tët. L’acordanza definësc che la IDM sará de 60 porcënt de proprieté dla Provinzia y por 40 porcënt dla Ciamena dl comerz. „L’IDM sará na fujina creativa che pitará sorvisc y svilupará idees por les realisé adöm ai produturs locals y che si fistidiará ince da ti dé visibilité ai produc locai“: chësta la descriziun dl presidënt dla Provinzia Arno Kompatscher y dl presidënt dla Ciamena dl comerz Michl Ebner, i dui rapresentanc di ënc che definësc insciö i compic prinzipai dl’aziënda nöia.
„La concorënza vëgn tres maiú y les ressurses finanziares desponibles mëss gní adorades te na manira ciamó plü efiziënta. Sce le Südtirol ó resté competitif spo él dötes les forzes y i mesi dl setur economich che mëss se colié: chësc sará ince plü saurí tl dagní por merit de chësta fujiun“, á splighé le presidënt Arno Kompatscher. Le presidënt dla Ciamena de Comerz Ebner á sotrissé che „les aziëndes südtirolejes á bojëgn de n partner che garantësc n sostëgn fort. L’aziënda nöia ará sorvisc ciamó plü efiziënc che portará ince a na maiú competitivité de nostes impreses tl marcé local y internazional.“
Le diretur general dla IDM sará Hansjörg Prast, diretur atual dla EOS, che á dit che i dui obietifs prinzipai dla IDM é „l’aumënt dla competitivité dles aziëndes südtirolejes y le svilup dl Südtirol a post plü atratif t'Europa“. L’aziënda nöia sará partida sö te trëi gran seturs d’aziun: le setur dl „Development“ cun a cé Hubert Hofer che se fistidiará dl sostëgn al'inovaziun, dla descurida de trends y dl svilup de idees, le setur dl „Sales Support“ cun le diretur Markus Walder che sará le punt de referimënt por les aziëndes che laora ti seturs dla promoziun dles venüdes, dles fieres o dl’internazionalisaziun. Le terzo setur reverda indere le setur dla „Communication“ cun le suranstant Marco Pappalardo che se fistidiará cun so team dles PR y dla comunicaziun. I trëi seturs d’aziun gnará sostignis por ci che reverda l’aministraziun da n team cun a cé Andrea Zabini. Dötadöm fajará pert dl’aziënda nöia IDM Südtirol – Alto Adige indöt 170 colaboradus cun a desposiziun por le 2016 de n budget de zirca 40 miliuns de euro.
OSP
Galaria dales fotografies
