Dala Junta: bandida de gara por la trasfujiun de sanch y contrat cun l’AVIS
11 Regiuns talianes laora para tl ciamp dla medejina de trasfujiun de sanch. Tl chëder de chësta cooperaziun á la Junta provinziala aprové incö (ai 27 d’otober) na bandida de gara interregionala por la lauraziun dl sanch y di componënc dl sanch. Implü él gnü renové la convenziun cun l’AVIS cina le 2018.
Tl ciamp dla medejina de trasfujiun dl sanch él 11 Regiuns talianes che laora adöm cun a ce la Regiun dl Venet. La Junta provinziala á aprové incö, mertesc ai 27 d’otober, n’acordanza interregionala por na bandida europeica che reverda la lauraziun dl sanch y di componënc dl sanch (plasma derivati) aladô de criters dër cualificá. Chësta acordanza interregionala ti consënt ala Provinzia da podëi adoré les conescënzes cliniches y aministratives d'atres Regiuns y da atué condiziuns y tarifes a miú marcé por la trasfujiun de sanch y di componënc dl sanch. „Na bandida de concurs ma por la Provinzia de Balsan ess porté para n pëis burocratich plü alt cun le 70 porcënt de cosć implü“, sotlignëia l’assessuria provinziala por la sanité Martha Stocker.
Por merit de indöt 18mile donadus de sanch y de 25 mile donaziuns al ann pó la Provinzia de Balsan curí dötes les domandes, mo por le tratamënt de tröpes maraties, dantadöt ti seturs oncologics, neurochirurgics y cardiochirurgics, vëgnel damané na lauraziun spezifica dl sanch. „Cun l’acordanza nöia vëgnel insciö garantí la presënza te dötes les Regiuns de strotöres por le tratamënt de sanch y di componënc dl sanch, sciöche ince de n’assistënza spezialisada ti ospedai aladô de criters cualitiatifs aprová“, ajuntëia le presidënt dla Provinzia Arno Kompatscher.
La Junta provinziala á aprové incö ince la conveziun cun l’ „Associazione volontari italiani sangue – AVIS“ por la perioda 2016-18. L’AVIS é n partner reconesciü sciöche assoziaziun de donaziuns de sanch y laora bele da plü agn adöm cun la Provinzia por ci che reverda l’atuaziun dl plann provinzial dl sanch. I compic dl AVIS é danterater la sensibilisaziun, la consulënza y l’informaziun sön la donaziun dl sanch. La colaboraziun cun les assoziaziuns de donadus dl sanch á ince porté ala realisaziun dla campagna „Dona vita – Scinca vita“ che é ince gnüda confermada sëgn tal convenziun trienala cun l’AVIS.
rc
