Dala Junta: interpretaziun autentica por le bonus energia
Na sentënza fata da püch dal TAR de Balsan â detlaré che le bonus cubatöra é ma legitim por le ressanamënt energetich de frabicac esistënc y nia por costruziuns nöies, sciöche indere preodü dala Junta provinziala. Por stlarí la chestiun á la Junta provinziala aprové incö (27/10) na proposta de mudaziun dl articul 127 dla lege urbanistica provinziala, che vëgn sëgn menada inant al Consëi provinzial
Por atué les diretives europeiches sön l’efiziënza energetica tl frabiché abitatif y sön la promoziun dl’adoranza de fontanes de energia renovables á la Junta provinziala emané desposiziuns spezifiches contignüdes tl articul 127 dla lege urbanistica provinziala. En particolar él preodü poscibilités da frabiché ajuntives che é conzedüdes cun le fin da promöie n mioramënt dl’efiziënza energetica di frabicac y l’adoranza de energies renovables. Sön la basa de chësta desposiziun â la Junta provinziala conzedü tl merz 2013 le bonus energia – tres n aumënt de cubatöra – a chi che realisëia n mioramënt energetich dl frabicat che vá sura i standarg plü basc scric dant. Chësta regolamentaziun é gnüda aplicada cina sëgn.Dan da püch á indere le TAR de Balsan emané na sentënza, en referimënt a n proiet d’abitaziun a Scena, che dij che le bonus cubatöra ne ti speta nia ales costruziuns nöies y che á porté a na gran malsigurté tles istituziuns y pro chi che á fat domanda. Por arjunje le mioramënt energetich di frabicac á la Junta provinziala aprové incö na proposta da inserí n articul 127/bis cun n’interpretaziun autentica dl articul 127 (coma 3) dla lege urbanistica provinziala. „Le stlarimënt aprové da pert dla Junta mantëgn insciö la poscibilité da adoré le bonus energia ti caji dles costruziuns nöies y de ressanamënc de frabicac bele esistënc“, spliga l’assessur por le svilup dl teritore y dl’energia Richard Theiner.
rc
