Dala Junta: La Provinzia fajará pert dl Zënter de Trënt dl’OCSE
La Junta provinziala á tut la dezijiun incö (27/10) da fá para pro les ativités dl zënter LEED de Trënt dl’OCSE (Organisaziun por la cooperaziun y le svilup economich), che sostëgn les istituziuns tles ativités de svilup local y d’ocupaziun. La Provinzia fajará na convenziun cun l’OCSE por realisé na colaboraziun cun le Zënter LEED de Trënt.
A Trënt él gnü istituí tl 2003 na sënta operativa dl'OCSE che dá fora stüdi y statistiches, che organisëia seminars y incuntades de barat por funzionars y aministradus. La misciun dl Zënter LEED, en colaboraziun cun la Provinzia de Trënt, é chëra da svilupé inant les competënzes ti seturs dl svilup local y dl’ocupaziun. Implü á le Zënter ince l’obietif da mioré la cualité dles politiches publiches locales tres n monitoraje y valutaziuns costantes dles pratiches adorades. L’OCSE á comuniché süa desponibilité da amplié süa colaboraziun ince ala Provinzia de Balsan y ala Regiun Trentin-Südtirol.
La Junta provinziala á insciö tut la dezijiun da fá pert dla rëi de colaboraziun dl zënter LEED dl'OCSE de Trënt cun na cuota anuala de 200mile euro. Adöm cun i partners dla Provinzia de Balsan y l’OCSE él bele gnü elaboré na proposta de n’agenda de „Capacity Building“ (formaziun dles capazités), tres chëra che al sará poscibl da ti mëte a desposiziun ai funzionars i stromënc nezesciars por le svilup local. „L’Agenzia prevëiga danter l’ater scomenciadies ti seturs dla consulënza y tla valutaziun dla politica regionala europeica tl Südtirol, cun n interes particolar ai programs che reverda i fonds strotorai“, á splighé le presidënt Arno Kompatscher.
L’Ocse é n’organisaziun metüda adöm da 34 Paisc comëmbri che ciara da promöie politiches che favorësc le bëgnester di zitadins. Le program LEED dl’Ocse por le svilup local y l’ocupaziun aconsiëia i governs y les istituziuns sön co ti respogne ales mudaziuns economiches cun l’obietif da cherié posć de laur nüs y da aumenté ince la cualité. Te chisc agn á le zënter LEED de Trënt realisé na seria de seminars, conferënzes, workshops, valutaziuns y analises, stüdi y publicaziuns sön tematiches desvalies y vijites internazionales. Indöt ál tut pert ales ativités plü co 17mile funzionars de istituziuns politiches, de ënc dla publica aministraziun y operadus dl ciamp economich y dl svilup da plü co otanta Paisc (mëmbri y nia mëmbri OCSE).
rc
