Dala Junta: inciaria ala SEL Spa por completé la sortida da Edipower
Les tratatives por la sortida de SEL Spa dala sozieté energetica taliana Edipower é gnüdes deliberades. Incö (ai 27 d’otober) s’á la Junta provinziala dé jö cun i proscims vari da fá y á confermé le sostëgn ala SEL por la conclujiun dles tratatives cun Edison por ci che reverda la surantuta di implanc idroeletrics tl Südtirol.
La Junta provinziala s’á dé jö cun l’acordanza cheder che prevëiga la sortida dla SEL Spa dala sozieté energetica taliana Edipower. „La SEL dará jö süa picia cuota de partezipaziun dla sozieté statala Edipower“, á splighé le presidënt Kompatscher. Chësta cuota de mendranza dl 8,5 porcënt vëgn trasformada te n pachet de implanc idroeletrics dl Friul, che dess gní a se le dé cun na spartiziun dla Edipower. „I sun contënc che al é sté meso da arjunje chësta sortida te n tëmp plü cört co preodü“, á ajunté le presidënt do la sentada. Aladô dl’acordanza de fujiun êl preodü che la SEL ess tut en conscidraziun l’opziun de sortida da Edipower impormó tl 2017.
Contënt dla sortida é ince l’assessur provinzial por l’energia Richard Theiner. „Cun chësta operaziun sarál poscibl da amplié la lista de implanc idroeletrics cun la produziun de energia renovabla. La SEL fej insciö n ater vare inant cuntra l’atuaziun dla strategia de sconanza dl clima cun vanatji sides por l’ecologia co por l’economia.“
Chësta dezijiun é ince la basa por les tratatives dla SEL cun l’Edison che dess porté ala surantuta dles cuotes che Edison á tles sozietés Hydros Srl y Seledison Spa. „L’obietif detlaré é chël da surantó al 100 porcënt düc i 9 gragn implanc idroeletrics dla Seledison y dla Hydros“, á detlaré Kompatscher. La surantuta dles cuotes dla Edison di implanc idroeletrics tl Südtirol foss n ater vare important dla SEL por avëi la produziun de energia daldöt tles mans dl Südtirol. „Chësc obietif é fondamental por nosc teritore, deache l’energia é öna dles ressurses strategiches plü importantes“, sotlignëia Theiner. Te chësc vers fossel spo poscibl da avëi atué dötes les premisses por assiguré n refornimënt autonom dl’energia tl Südtirol.
rc
