Dala Junta: bilanz de 5,4 miliarg, aprové le dessëgn de lege
Löm vërda dala Junta provinziala al dessëgn de lege che reverda le bilanz de previjiun 2016, le pröm elaboré aladô dla stroröra de contabilité nöia. L’eserzize messass se stlüje cun 5,4 miliarg de euro y tl zënter sarál chësc ann indô les alisiraziuns fiscales, cun l’aumënt dla No-Tax-Area sön l’ajunta IRPEF.
Garantí les ressurses por i sorvisc y i investimënc nezesciars por mantigní le standard alt de cualité dl „sistem Südtirol“ y tl medemo momënt alisiré les aziëndes y les families da na presciun fiscala massa alta. Chëstes é les döes diretives prinzipales, aladô de chëres che al é gnü stabilí le percurs d’elaboraziun dl bilanz de previjiun 2016 aprové incö (ai 27 d’otober) dala Junta provinziala. Öna dles sfidades dla proposta dl bilanz de previjiun 2016 é stada l’introduziun dl sistem de contabilité nü „armonisé“. „Na novité che reverda dantadöt la metoda y nia la sostanza – á sotligné le presidënt Arno Kompatscher – y che garantirá na maiú trasparënza dles diretives stabilides a livel europeich y nazional.“
Öna dles diretives prinzipales dl bilanz de previjin 2016 é les alisiraziuns fiscales. Sides por les families co ince por les impreses. „Öna dles mudaziuns plü importantes y aprijades dai partner soziai é l’alzada dla No-Tax-Area sön l’ajunta regionala IRPEF cun l’import d’esenziun che passa da 20mile a 28mile euro“, insciö le presidënt Kompatscher. Chësc ó di che chi che á n davagn anual sot ai 28mile eruo ne paiará nia l’ajunta IRPEF, y che por düc i atri reverda la cuta ma la zifra sura la No-Tax-Area, zënza cumpedé lapró la detraziun di 252 euro preodüda por vigni möt „a ciaria“. „Dötadöm portará para chësta mosöra n smendrimënt de entrades por la Provinzia de söporjö 14 miliuns de euro“, insciö le Presidënt dla Provinzia. Por ci che reverda indere les impreses él gnü confermé les alicuotes IRAP al 2,68 porcënt, „na zifra che é tl Südtirol cotan plü bassa co tl rest dla Talia“, á prezisé le presidënt Kompatscher. A livel statal él insciö preodü n’alicuota ordinara de 3,90 porcënt che pó gní ampliada o smendrida dl 0,92 porcënt da pert dles Regiuns.
N ater passaje important é chël che reverda le personal: sön la basa dl passaje de competënzes nöies en relaziun al Parch nazional dl Stelvio, al Tribunal aministratif, al’integraziun dla Fondaziun Vital, al potenziamënt di sorvisc di programs europeics y ala surantuta de n valgönes competënzes dla BLS prevëiga le bilanz 2016 na chersciüda dla planta organica de 96 unités. „Dal 2011 ne él nia gnü registré n aumënt de posć de laur da pert dla Provinzia, chësta é sëgn na mosöra nezesciara por podëi garantí na seria de sorvisc gnüs lapró“, insciö l’assessuria por le personal Waltraud Deeg.
rc
