Südtirol digital 2020, scomencé le percurs por n’aministraziun plü moderna
Mosöres, proiec y obietifs por sostigní le svilup de n’aministraziun tres plü moderna y orientada al dagní: chësc é le contignü dl plann strategich Südtirol digital 2020 aprové inier dla Junta provinziala y presenté incö (ai 28 d’otober) dal’assessuria Waltraud Deeg.
Le proiet Südtirol digital 2020 é gnü metü man tl’aisciöda dl ann passé, canche la Junta provinziala ti â dé l’inciaria al Departimënt familia y aministraziun da elaboré n plann por realisé i obietifs scric dant da Roma y Bruxelles por ci che reverda le svilup digital dl’amministraziun publica. Te chësc ann y mez él gnü a se le dé n prozes partezipatif cun la pröma fasa che é gnüda stlüta jö inier (ai 27 d’otober) cun l’aprovaziun da pert dla Junta dl plann strategich. Chësc documënt de planificaziun prevëiga cinch raiuns d’aziun: infrastrotöra digitala, aministraziun digitala, economia digitala, formaziun digitala y IT-Governance. „I sun dötaurela tl laur da lauré– á sotligné l’assessuria Deeg – a na manira che i sorvisc IT dles strotöres aministratives desvalies, dala Provinzia ai ënc locai, dala scora ala sanité, pois gní scemplificá y armonisá. Döt chësc por che i zitadins y les impreses pois s’anuzé di sorvisc te na manira plü asvelta y efiziënta.“
Le plann strategich ne reverda insciö nia ma le program d’atuaziun de svilup digital dla Provinzia de Balsan, mo ince na mapa de „works in progress“ por podëi s’adaté ales mudaziuns dl setur. Le diretur dla Repartiziun informatica, Kurt Pöhl, á sotligné che „le plann strategich scrí dant le percurs por ademplí les ghiranzes dles diretives europeiches. Implü vëgnel sostigní le prozes d’inovaziun y dla cultura digitala dla sozieté südtiroleja.“ L'assessuria Deeg y le diretur de Repartiziun Pöhl á ince recordé i vari inant bele fac ti ultims mëisc tres na seria de mosöres contignüdes tl plann strategich Südtirol digital 2020. Dal’introduziun de na strotöra unica de governance suraistituzionala tl setur informatich ala scemplificaziun dles prozedöres d’ativaziun dl account dl zitadin, zënza ne desmentié nia l’impëgn por amplié la rëi dla banda leria sura döt le teritore provinzial. Implü él ciamó en elaboraziun le renovamënt dla presënza web dla Provinzia de Balsan cun na homepage nöia www.provinzia.bz.it y 15 plates tematiches por rové ciamó plü daimpró ales ghiranzes dl zitadin. Le plann strategich é a desposiziun por le download sot ala misciun aad2020.provincia.bz.it.
rc
Galaria dales fotografies
Foto USP/rm
