„Bëre cun mosöra“, presentada la campagna de prevenziun sön l’alcol
Indicaziuns stradales, placac sön les corieres, anunzies tl radio, informaziuns sön internet y ti social media. Da indoman, ai 30 d’otober, pëia indô ia te döt le Südtirol la campagna de prevenziun sön l’alcol „Bëre cun mosöra“. N tema tres d’atualite che reverda dötes les generaziuns cun söporjö 3mile porsones che á damané l’ann passé tl Südtirol aiüt por problems cun l’alcol.
„La prevenziun – á sotligné l’assessuria por la sanité Martha Stocker – é la pröma mosöra y ince chëra plü importanta por smendrí i problems che taca adöm cun l’alcol. Por merit de campagnes de informaziun sciöche chëstes y dl laur costant dles organisaziuns de prevenziun söl teritore él poscibl da sensibilisé tröpes porsones por se comporté te na manira responsabla. Un di resultac da alzé fora dla campagna é por ejëmpl i dac che reverda le numer dles patents tutes por gaujia de n consum de alcol massa alt che ê dl 2008 ciamó 1.600, é sté dl 2014 ma plü 683. Chësta diminuziun ne é dessigü nia la conseguënza de manco controi sön strada, mo propi por merit dles mosöres de prevenziun.“ La campagna „Bëre cun mosöra“ é gnüda presentada incö, ai 29 d’otober, dal coordinadú dl Forum prevenziun, Peter Koler, che á sotligné l’importanza da traté la tematica te na manira „pragmatica y nia ideologica“, cun l’obietif da promöie la responsabilité individuala de vigni porsona. „Nosta intenziun é chëra da sostigní formes y usanzes de consum che portes a n smendrimënt di pericui y dles conseguënzes negatives“, insciö Koler.
I messaji che é gnüs presentá tratan la campagna sará cater y ará tl zënter la promoziun dl’importanza da ne bëre mai canche an rovënn. Dantadöt por i jogn él gnü cherié na plata Facebook dal inom „Sauftirol – Alcol Adige?“ che á plü co 15mile likes y che é ince n meso efiziënt por baié cun i jogn. Danter les ativités dl Forum prevenziun por ci che reverda l’alcol á Koler sotligné i intervënc pro la sënta dl pröm aiüt da Balsan (passá da 546 tl 2009 a 460 tl 2014), le laur de rëi cun operadus che laora söl post, n documënt cun regoles por „festes responsables“ y colaboraziuns cun i sorvisc ai jogn. „Le consum de alcol al de da pert dla popolaziun dl Südtirol é de 18,5 porcënt y é plü bassa co le valur mesan talian. Un di problems plü atuai reverda ince le „binge drinking“, chël ó di boiüdes cun plü de 5 unités de alcol te ma öna n’ocajiun“, á ajunté Peter Koler.
Le responsabl clinich dl’organisaziun Hands sciöche ince dotur dl Sorvisc por les dependënzes dl Raiun sanitar de Balsan, Alberto Degiorgis, á implü sotligné che „la cuantité d’alcol de un n gote de bira, de vin o de ega de vita é söporjö la medema.“ Aladô di dac él tl Südtirol 3mile porsones che á damané dl 2014 sostëgn por problems de alcol. Chësc numer ne se á nia mudé cotan en confrunt ai agn da denant cun na cuota de 20-25 porcënt de ëres.
Por Degiorgios él fondamental da „svilupé inant le laur söl post y tles scores“, danter les novités dla campagna él da segnalé la daurida da sëra (por dui iadi al’edema) cina les 22.00 dl ambulatore Hands da Balsan y l’elaboraziun de n protocol nü por i tratamënc de dorada cörta a Bad Bachgart. Informaziuns plü menüdes pon ciafé sot a: www.bereresponsabile.it.
rc
