Familia | 30.10.2015 | 12:14

La Consulta familia incunta Kompatscher: alisiraziuns fiscales, assistënza

La Consulta por la familia á incunté le presidënt Arno Kompatscher por tematisé n valgügn di seturs prinzipai dla politica por la familia: dales alisiraziuns fiscales preodüdes tl bilanz ala lege sön i apalc, cina ales diretives por l’assistënza al’infanzia. „La politica por la familia – á splighé Kompatscher – é danter les priorités dla Junta, por chësc ann ti él gnü assegné 500 miliuns.“

L’incuntada, a chëra che al á ince tut pert l’assessuria Waltraud Deeg, é gnüda a se le dé püch do la löm vërda dla Junta al bilanz de previjiun 2016 y propi la despartiziun dles ressurses finanziares danter les seziuns desvalies é stada tl zënter dl raport da pert dl presidënt dla Provinzia. „Di indöt 5,4 miliarg de euro ti él gnü assegné ala mosöres por les families y les politiche soziales indöt 500 miliuns. Danter les mosöres preodüdes él da ciafé l’aumënt dla No-Tax-Area sön l’ajuntiva regionala IRPEF che passa da 20mile a 28mile euro: n provedimënt important che fej pert dl pachet de alisiraziuns fiscales dl bilanz de previjiun 2016“, insciö Kompatscher.

„Tratan l’elaboraziun dl bilanz él ince sté meso da curí les domandes do ressurses ajuntives da pert dl setur dles families por porté inant na seria de proiec y scomenciadies tl dagní“, á splighé inant l’assessuria Waltraud Deeg. Tratan l’incuntada cun la Consulta dles families él implü ciamó gnü traté la tematica che reverda la lege sön i aplac nöia, en manira particolara por ci che reverda la surantuta di sorvisc d’assistënza dla pröma infanzia da pert di Comuns. „Cun l’aumënt di limic che prevëiga la nezescité da scrí fora bandides sarál tl dagní plü saurí da assegné na seria de sorvisc“, insciö Kompatscher.

La diminuziun dla burocrazia y n’azeleraziun dles prozedöres é ince döes dles diretives dl’assistënza por l’infanzia nöia che prevëiga n ampliamënt cuantitatif y cualitatif dl’oferta. „I sun tl lauré ai ultims punc en colaboraziun cun i Comuns y dötes les atres perts interessades. De manco burocrazia ó ince dí plü segurëza y stabilité“, insciö Deeg. L’incuntada é gnüda stlüta jö cun l’intenziun dl organ de consultaziun dla Junta da se odëi plü gonot cun le presidënt Kompatscher tl dagní por chestiuns che reverda la familia.

rc

Galaria dales fotografies

Le presidënt Arno Kompatscher y l'assessuria Waltraud Deeg: la politica por les families é öna dles priorités dla Junta provinziala.

N retrat dl'incuntada dla Consulta familia cun le presidënt dla Provinzia Arno Kompatscher.
Foto USP/rm