Ediziun nöia dla revista „Ëres“: 25 agn de impëgn por les ëres
Dan da püch él gnü publiché l’ediziun plü nöia dla revista d’informaziun „ëres“. L’ediziun ti é gnü dedicada al aniversar di 25 agn dala nasciüda dla Comisciun provinziala por l’avalianza dles oportunités che é stada buna da arjunje te so percurs de plü obietifs. Tröpes mosöres y scomenciadies dla comisciun á insciö contribuí a svilupé inant positivamënter la sozieté tl Südtirol.
En gaujiun dl aniversar di 25 agn dala nasciüda dla Comisciun provinziala por l’avalianza dles oportunités dles ëres ti él gnü dediché l’ediziun nöia dla revista d’informaziun „ëres – FrauenInfodonne“ propi a chësta tematica. Al sará poscibl da lí do y da s’informé sön les ativités prinzipales dla comisciun dal 1990 inant y dles ghiranzes por le dagní. Insciö ne vëgnel nia ma presenté i vari inant fac, mo al vëgn ince pité na suraodüda sön les campagnes plü interessantes y la top 3 di „davagnadus“ di comoc d’or. Le contribut por ladin é chësc iade de Erica Mair Senoner, ex raprejentanta ladina tla comisciun provinziala por l’avalianza dles poscibilités che cunta de sües esperiënzes sciöche comëmbra dla comisciun. Implü vëgnel ince analisé la domanda, sce la Comisciun por l’avalianza é ciamó nezesciara aldedaincö y cara che sará süa funziun tl dagní.
L’ediziun nöia dla revista „ëres“ é online sön la plata internet http://www.provincia.bz.it/pariopportunita/eres.asp olache an pó ince damané la spediziun a ciasa de na copia. Informaziuns plü monüdes pon ince ciafé pro le Sorvisc Ëres, tla strada via Dante 11 a Balsan, tel. 0471 416950, e-mail serviziodonna@provincia.bz.it
rc
