Dala Junta: tickets tla sanité, manco burocrazia por l’esenziun ilimitada
Dal mëis de aurí dl 2014 él gnü aprové l’esenziun zënza scadënzes dal paiamënt dl ticket por paziënc che á maraties croniches de zircolaziun. Cun la deliberaziun aprovada incö (ai 3 de novëmber) dala Junta provinziala vëgn le passaje dal sistem vedl (36 mëisc) al sistem nü (zënza limic de tëmp) fat te na manira automatica. „L’obietif – sotlignëia Stocker – é chël da smendrí la burocrazia."
Aladô dla relaziun sanitara dl 2014 patësc le 28,2 porcënt dla popolaziun dl Südtirol de na maratia cronica y á insciö le dërt da damané do l’esenziun dal paiamënt dl ticket por les prestaziuns sanitares. Danter chisc él danterater paziënc che é amará de maraties dla zircolaziun dl sanch, zirolaziun di fiá blanc o dles arteries, arterioles, capilara, dles avënes y dla zircolaziun linfatica. Por chësta categoria de paziënc él preodü dal aurí dl 2014 inant le passaje da n’esenziun limitada tl tëmp (renovamënt vigni 36 mëisc) a n’esenziun zënza limic do na zertificaziun dl renovamënt dla esenziun cun na vijita spezialistica. „Al messará ciamó gní fat öna na vijita spezialistica de zertificaziun dl renovamënt che ará spo valüta por döt le percurs de cura tl dagní“, á splighé incö l’assessuria por la sanité Stocker.
„Por smendrí le pëis burocratich á la Junta insciö tut la dezijiun da autorisé na converjiun d’ofize: prësc dötes les 1200 porsones che á atualmënter l’esenziun á la segurté da ciafé le renovamënt zënza limic temporai“, á splighé l’assessuria Stocker. Deache na gran pert de paziënc cun patologies croniches é i seniors dles ciases de palsa gnarál mené la zertificaziun por l’esenziun dl paiamënt, do la viijta spezialistica, diretamënter por posta ai paziënc che messará spo la taché tl liber sanitar.
rc
