FSE: nomina di funzionars de gestiun, audit y zertificaziun
La Junta provinziala á fat n vare inant incö por ci che reverda l’atuaziun tl Südtirol dl program plurianual nü (2014-2020) dl Fonds sozial europeich. Sön proposta dl presidënt Kompatscher él gnü nominé les porsones che manajará i rodi dl’autorité de gestiun, dla zertificaziun y dl audit. Le presidënt Kompatscher á implü anunzié da orëi „stlü jö cina d’isté la contabilité intardiada dl FSE.“
Tratan l’isté êl gnü da Bruxelles la löm vërda ala proposta südtiroleja che reverda le program operatif dl Fonds sozial europeich por la perioda 2014-2020, n proiet che prevëiga l’assegnaziun de 136 miliuns de euro dal Fonds europeich da destiné a investimënc por le svilup dla chersciüda y dl’ocupaziun tl Südtirol. Por rové ala fasa de atuaziun dl program ti damana l’Uniun europeica ai ënc locai le respet de na seria de parametri che reverda i sistems de gestiun y de control y propi cun chësta chestiun s’á dé jö incö la Junta provinziala.
Por ademplí a chëstes ghiranzes á la Junta provinziala, sön proposta dl presidënt Arno Kompatscher, nominé incö les porsones che gnará inciariades di rodi dl’autorité de gestiun, dl’autorité de zertificaziun y dl’autorité dl audit. Al se trata de trëi funzionars dla Provinzia: le diretur dl Ofize FSE, Albrecht Matzneller (gestiun), le diretur dl Ofize de paiamënt provinzial Marco Dalnodar (zertificaziun) y dla direturia dl Raiun Autorité dl audit por i finanziamënc comunitars Cinzia Flaim (audit).
La nominaziun di trëi funzionars é ince stada por le presidënt Kompatscher l’ocajiun por presenté la situaziun atuala che reverda la perioda dal 2007 al 2013, che á porté para na seria de intardiades tl paiamënt dles somes ai ënc de formaziun. „I sun stá bugn da fá de gragn vari inant por rové a stlü jö le plü debota che ara vá chësc capitul y i laurun por avëi la contabilité stlüta jö de dötes les pratiches dl Fonds sozial europeich cina l’isté 2016.“
Por arjunje chësc obietif, á prezisé le presidënt Kompatscher, gnarál metü a desposziun personal implü al Ofize FSE, olache al laora dötaurela 25 colaboradus. „Cater porsones gnará lapró sciöche resultat dl concurs apëna stlüt jö y d’atri podará ciamó rové lapró dal Zënter d'assistënza y formaziun Formez cun contrat a tëmp determiné. Te vigni vërs sunse sön la dërta strada por ci che reverda la funziun de control di proiec“, á stlüt jö Kompatscher.
rc
