Dala Junta: Dal FESR 16,5 miliuns por la digitalisaziun y sostenibilité
Contest digital y ambiënt sostenibl: chisc é i dui seturs che ciafará 16,5 miliuns de euro dal Fonds europeich de svilup regional, FESR. La Junta provinziala, sön proposta dl presidënt Arno Kompatscher, á aprové incö ai 10 de novëmber les prömes döes bandides por la presentaziun di proiec.
Le program „Investimënc a bëgn dla chersciüda y dl’ocupaziun“ dl FESR reverda la perioda 2014-2020 y mët a desposiziun indöt ressurses por 136 miliuns de euro. Le 50 porcënt dles ressurses gnará garantides dal’Uniun europeica, le 35 porcënt dal Stat y le 15 porcënt che resta dala Provinzia. Incö, mertesc ai 10 de novëmber, á la Junta provinziala aprové les bandides por la presentaziun di proiec ti pröms dui seturs: contest digital y ambiënt sostenbil."Te trami dui i seturs él les istituziuns publiches, la Provinzia, i Comuns, les Comunités comprensoriales y l'Aziënda sanitara, che ará la poscibilité da fá domanda por n contribut dal FESR por proiec te chisc dui seturs", á splighé le presidënt dla Provinzia Arno Kompatscher incö do la sentada dla Junta.
Por ci che reverda l’ambiënt sostenibl gnarál scrit fora i pröms 11 miliuns di 40 preodüs por döta la dorada y i proiec messará avëi sciöche punt zentral le mioramënt dl’efiziënza energetica di frabicac. Le termo por la presentaziun dles domandes toma ai 29 d’aurí dl 2016. „Aladô dl’Uniun europeica vëgn le 40 porcënt dl consum energetich produt propri dai frabicac instësc, y le potenzial di frabicac é insciö dër gran“, sotlignëia l’assessur Richard Theiner.
Por ci che reverda indere le mioramënt dl contest digital südtirolej é la pröma bandida curida cun 5 di zirca 23 miliuns de euro metüs a desposiziun cina le 2020. I pröms intervënc ará le focus sön le mioramënt di sorvisc dl eGovernment da pert dles aministraziuns publiches. Te chësc caje dess i proiec gní presentá cina ai 4 de merz dl 2016. „Al se trata de n contribut important ince al proiet strategich Südtirol digital 2020 por n’aministraziun provinziala plü daverta, trasparënta y dlungia ales esigënzes di zitadins“, insciö l’assessuria Waltraud Deeg. Al gnará ametü i proiec sura i 100mile euro y les döes bandides aprovades dala Junta gnará publicades sön la plata internet dla Repartiziun Europa, sciöche ince sön le Boletin Ofizial dla Regiun Trentin-Südtirol.
rc
