Dala Junta: Regolamënt dl comerz de venüda al detai tles zones produtives
La Junta provinziala á aprové incö (ai 10 de novëmber) le regolamënt d’esecuziun sön les zones por insediamënc produtifs y á stabilí les porcentuales da ti dé al comerz al detai. Chësta pert ne pó nia superé le 10 porcënt dla cuota preodüda por les ativités de prestaziun de sorvisc tles zones produtives.
Sön la basa dla lege urbanistica provinziala nöia dl 2014 y do n’analisa sön la spartiziun dles ativités conzedüdes tles zones por insediamënc produtifs y sön sües conseguënzes sön l'urbanistica locala, él la Junta Provinziala che á definí n regolamënt d’esecuziun che definësc avisa la porcentuala resservada ales ativités de prestaziun de sorvisc. Aladô dla relevaziun plü atuala fata dal’Aministraziun provinziala en colaboraziun cun i Comuns ne él gnü registré degöna nezescité da mudé la cuota resservada ales ativités de prestaziun di sorvisc. La relevaziun á ince analisé i dac sön la cubatöra mascima poscibla por les ativités de sorvisc.
La Junta provinziala á insciö aprové n regolamënt de esecuziun che reverda les zones por insediamënc produtifs y á stabilí la pert che ti speta al comerz al detai pro les ativités de prestaziun di sorvisc. “La cuota de cubatöra por le comerz al detai ne pó insciö nia superé le 10 dla cuota preodüda por les ativités de prestaziun de sorvisc tles zones de produziun”, á splighé le presidënt dla Provinzia incö do la sentada dla Junta. Aladô de n’analisa che reverda les strotöres de comerz bele esistëntes él zirca 110 Comuns sön i 116 Comuns dl Südtirol che á ciamó poscibilités da podëi apliché la cuota dl 10 porcënt y porchël ne é chësta dezijiun dla Junta nia en contrast cun la liberalisaziun statala, ince sce le Südtirol ó mantigní sües limitaziuns tl setur dl'urbanistica.
La dezijiun dla Junta tol insciö en conscidraziun la nezescité da garantí le mantignimënt dl comerz de vijinanza ti zëntri di paisc por sostigní n svilup costant dla popolaziun ti raiuns y por lauré cuntra i fenomens de isolamënt y spopolaziun. Le regolamënt de esecuziun garantësc ince le bojëgn da assiguré n svilup dles ativités comerziales en armonia cun la sconanza dl ambiënt y dl’urbanistica dl teritore, sciöche ince la proteziun di raiuns da munt. La priorité reverda l’adoranza dles zones da frabiché bele esistëntes. Le regolamënt ne comporta nia n aumënt automatich dla spersa por le comerz de venüda al detai: l’iter prevëiga n’ejaminaziun dl impat ambiental y na dezijiun dl Consëi comunal sön l’inserimënt dl’area tl PUC.
rc
