Dala Junta: aprovada l’acordanza cheder sön la litiga cun la Brennercom
La Junta provinziala á aprové incö (ai 10 de novëmber) l’acordanza cheder de contlujiun dla litiga sön la partezipaziun tla Brennercom: l’acordanza prevëiga la spartiziun dla rëi dla banda leria dala Spa, rëi che ti passará al’istituziun publica. La Provinzia ó insciö mët le focus sön le svilup dla banda lëria, sciöche preodü dan da n ann dal plann dles venüdes dles partezipaziuns provinziales.
Por stabilí na strategia de svilup dla chestiun che á porté i ënc publics dla Provinzia, Selfin y dla ASM da Porsenú, da fá recurs cuntra le Consëi d’aministraziun dla Brennercom che â detlaré la decadënza dles cuotes de partezipaziun di ënc publics al’aziënda, á la Junta provinziala scomencé tratatives cun la Spa („ma do le reinserimënt dla Provinzia tl register di mëmbri te Brennercom“, á prezisé le presidënt Kompatscher) che dess gní stlütes jö tosc y che prevëiga la spartiziun dla pert dla banda lëria che dess passé ala Provinzia.
Incö, ai 10 de novëmber, á la Junta provinziala aprové n’acordanza cheder danter les perts che definësc la spartiziun: l’ativité ti gnará assegnada dala Brennercom a n'aziënda nöia che gnará formada dai ënc publics che ne fajará nia plü pert dla Brennercom do la spartiziun. L’acordanza cheder prevëiga la nominaziun de dui esperc por pert por ejaminé la pert dl'aziënda che gnará spartida, che messará contigní le valur dla partezipaziun di ënc publics al momënt dla spartiziun sciöche ince la licuidité nezesciara por le svilup dla banda lëria. La basa por la valutaziun sará le bilanz de Brennercom ai 30 de novëmber dl 2015, che gnará fat dal'impresa de valutaziuns Deloitte Italia nominada por chësta inciaria dala Provinzia. Do chësc vare gnarál nominé n espert dl tribunal che ará l’inciaria da definí le proiet de spartiziun y che messará stabilí la divijiun dles aziuns ai mëmbri publics sön la basa dles cuotes de partezipaziun y de paiamënc implü eventuai.
I proscims vari é sëgn la reiscriziun di mëmbri de Selfin y ASM Porsenú tla Brennercom, la retrata dles deliberaziuns contestades dl CdA de Brennercom, l'architada di prozedimënc al tribunal dles imprejes da pert de düc i auturs interessá. Do la firma sön l’acordanza de spartiziun, do la creaziun dl’aziënda publica nöia y do la retrata dles deliberaziuns contestades gnará ince i prozedimënc atuai anulá.
„Le resultat final corespogn avisa ales deliberaziuns aprovades dan da n ann dala Junta che reverda la retrata dles partezipaziuns provinziales: nosc obietif ê y resta chël da ademplí a nosc compit istituzional che prevëiga la promoziun dla banda leria sön le teritore por podëi garantí n azes internet asvelt te vigni Comun, por vigni impresa y zitadin“, á stlüt jö Kompatscher.
rc
Galaria dales fotografies
