La Provinzia investësc sön la colaboraziun cun Fraunhofer Talia
N renforzamënt dla posiziun söl marcé internazional, le sostëgn dles ativités d’archirida y de inovaziun y la garanzia de personal cualifiché: chisc é i fins dl’acordanza danter la Provinzia y la sozieté Fraunhofer Talia, che fej laurs d'archirida da bele cinch agn a Balsan. I punc prinzipai dles ativités 2015-18 é gnüs presentá incö (ai 11 de novëmber) a Balsan.
„Bëgnester y laur é döes conseguënzes dl laur d’inovaziun y archirida che vëgn fat dales impreses, dai istituc y dales porsones“, á dit le presidënt dla Provinzia Arno Kompatscher incö ala presentaziun dla colaboraziun danter la Provinzia y l'istitut d'archirida Fraunhofer Talia. Le presidënt Kompatscher á ince fat referimënt tratan la conferënza stampa ai fins dl’Uniun europeica, che prevëiga n aumënt di investimënc te archirida y inovaziun cina le 2020 dl trëi porcënt dl PIL. Por podëi garantí na chersciüda sostenibla él nezesciar da sostigní tresfora l'archirida y l'inovaziun, insciö le presidënt dla Provinzia Kompatscher, „te chësc vers él dandadöt important da sostigní la colaboraziun danter les aziëndes y les istituziuns d’inrescida“.
Le presidënt dla Provinzia á firmé incö (ai 11 de novëmber) n’acordanza por la prestaziun de sorvisc cun la sozieté Fraunhofer Italia por i proscims trëi agn, cun chëra che la Provinzia ti garantësc ala aziënda n investimënt de 4,9 miliuns de euro por la dorada temporala 2015-2018. Cun chësta soma dessel gní curí le 40 porcënt dles spëises operatives, le 100 porcënt di investimënc y le 80 porcënt dles spëises d’afit. La condiziun é chëra che i cosć dl’inrescida sides avisa tan alc sce nia plü alc co le finanziamënt publich y che al ne sides insciö nia plü gran di cosć y investimënc dles ativités d’archirida.
Na panoramica sura les ativités y les arjuntes de Fraunhofer Talia ti cinch agn a Balsan é gnüda presentada dal suranstant dla sënta locala Dominik Matt che á ince presenté i obietifs por le dagní. Un di fins dl istitut Fraunhofer da Balsan é da avëi na funziun de lian danter l’inrescida y la pratica di Paisc todësc cun chëra dla Talia por ci che reverda i seturs dl’economia y dla sciënza.
Atualmënter laora 20 colaboradus pro Fraunhofer Talia y i seturs d’inrescida reverda dantadöt le svilup de produc, la produziun tl’agricoltöra, le frabiché, l’injiniaria informatica, sciöche ince la tematica "industria 4.0" che reverda les tecniches de informaziun, logistica y comunicaziun da mascin a mascin."N compit important tl dagní sará da atué le trend dla digitalisaziun ince ti seturs dl’agricoltöra y dl frabiché“, á splighé le suranstant Dominik Matt. Tla Germania é la sozieté Fraunhofer ativa cun indöt 68 istituc y istituziuns d’archirida cun 23.000 colaboradus y na soma totala d’investimënc de 1,9 miliarg de euro. Ala presentaziun dla colaboraziun danter la Provinzia y Fraunhofer Talia ál ince tut pert le diretur dl'Assoziaziun di imprenditurs Josef Negri y le diretur dla Repartiziun Inovaziun, Inrescida y Université Maurizio Bergamini Riccobon.
rc
