Veles: Kompatscher chërd duc a dé ju si stima sciche sëni de partezipazion
N dumëmia, ai 15 de nuvëmber, à la populazion de Natz-Schabs y de Urtijëi la puscibltà de lité l ambolt y l cunsëi cumenel nuef. L Presidëmt dla Provinzia Arno Kompatscher nviëia la zitadines y i zitadins a se nuzé dl dërt de lité.
N cont dla veles cumeneles a Urtijëi y a Natz-Schabs ti la cumët l presidënt Kompatscher ala populazion de chisc luesc de se nuzé dl dërt de vela atif, “che ti pieta ala/ai litadëures la puscibltà de tò pert ala furmazion politica dl’unità aministrativa. Na puscibltà che mostra si fazion dantaldut canche la se trata de n Chemun, che l’istanza plu daujin ala zitadinanza.” Kompatscher lecorda che l dërt de vela ie na seva mpurtanta dla democrazia: “Lité ie n at de maduranza y de gran respunsabltà persunela. Uni stima ie esprescion dla intenzion di zitadins de tò pert ala dezijions che reverda l guviern dl Chemun y cundechël l daunì de si cumenanza."
A Urtijëi àn de mei unì fat l’esperienza de cie che uel dì na partezipazion bassa ala veles. “Plu persones che porta a esprescion si usc y majera che ie la legitimazion dla persones litedes ti Cunsëies cumenei”, usservea l Presidënt. Arno Kompatscher fej donca apel ala zitadines y ai zitadins de Urtijëi y de Natz-Schabs de jì a lité: “N dumënia, ai 15 de nuvëmber, jide a lité y nciariede la candidates/i candidac che chirëis ora cun l duvier de trasfurmé te fac vosta intenzions y cunvinzions. Chi che ne lita nia ti lascia ai autri la facultà de dezider sun l daunì dla cumenanza te chëla che l viv.”
rc
