Mobilité, l'assessur Mussner sön l'aprovaziun dla lege nöia
Le sorvisc dl trasport assegné cun apalc en acordanza cun na concorënza regolamentada, sciöche preodü dal UE, la cualité alta dl sistem dl trasport publich local, la sconanza di dependënc y lauranc: chisc é por l’assessur Mussner i punc prinzipai dla lege sön la mobilité nöia aprovada incö (ai 13 de novëmber) dal Consëi provinzial.
„Cun chësta lege nöia orunse sostigní la promoziun dla concorënza danter les impreses tl setur dla mobilité y renforzé l’economia dl teritore por podëi ti pité ai zitadins sorvisc de cualité a tarifes conveniëntes“, á dit l’assessur por la mobilité Florian Mussner. Cun la lege nöia, che sotlignëia la competënza legislativa primara dla Provinzia ti confrunc dl Stat, vëgnel regolamenté danü na seria de seturs che reverda les bandides de gara, i contrac de sorvisc y i paiamënc che ti speta ai conzescionars por i sorvisc de corieres y de ferates tl trasport publich local, i sorvisc de trasport scolastich, les infrastrotöres nezesciares y la sconanza dles esigënzes di anuzadus dl sorvisc dl trasport publich. „Por le pröm iade vëgnel coiü adöm te öna na lege dötes les desposiziuns legislatives tl setur dla mobilité publica cina sëgn spartides te atres normes, che garantësc insciö da avëi desposiziuns scemplificades y tleres“, insciö l’assessur Mussner. Implü él gnü stabilí por le pröm iade te n test de lege provinziala ince les desposiziuns che reverda i sorvisc de trasport nia de linia, chël ó dí di auti (sot ai 9 posć) y dles corieres da impresté y di taxi.
N ater punt important dla lege nöia reverda la sconanza di dependënc y lauranc tl setur dla mobilité publica. Insciö él gnü inserí la norma che i manajadus di sorvisc é obliá da adoré les normes varëntes di contrac coletifs y di contrac ajuntifs dl setur, y implü mëssel gní mantigní i dërc arjunc di lauranc por ci che reverda le paiamënt, i agn de sorvisc y la profesciun. La lege, sotlignëia inant Mussner, é la basa prinzipala por le plann provinzial dla mobilité publica che stabilësc les linies y i critérs por garantí i sorvisc, les startegies economiches y soziales y la sostenibilité ambientala. Dui sará i aspec che messará ciamó gní aprofondis dal assessur Mussner cun i Comuns por ciafé n’acordanza y che reverda l’istituziun de n sorvisc de trasport por i mituns y mitans dla scolina y la realisaziun y manutenziun dles architades dles corieres.
Cun l’aprovaziun dla lege sön la mobilité publica pó sëgn pié ia la fasa de preparaziun dles bandides de gara di sorvisc por le trasport publich local. Cina merz dl 2016 dess le dessëgn dl plann provinzial dla mobilité cun i raiuns gní elaboré por podëi scomencé cun la preparaziun dla bandida de concurs d’aurí 2016. Ala fin dl ann 2016 dessel spo gní publiché tl Boletin Ofizial dla Uniun Europeica l’informaziun por firmé spo tl’aisciöda dl 2018 i contrac de sorvisc y por tigní ite insciö les diretives dl’Uniun europeica.
rc
