De di dërc dl'infanzia: pité segurëza y proteziun
En gaujiun dl De internazional di dërc dl'infanzia, che vëgn tigní ai 20 de novëmber, á l'assessuria provinziala por les politiches soziales Martha Stocker y chëra por la familia Waltraud Deeg alzé fora che les mitans y i mituns á le dërt da avëi a na familia che i dëides crësce sö cun amur, proteziun y segurëza.
"I messun ti garantí ales mitans y ai mituns, bel anfat da olach'ai vëgn y cara che é süa condiziun soziala, da podëi crësce sö sagns intun" dij l'assessuria Deeg en ocajiun dl De internazional di dërc dl'infanzia. Ara se trata da smendrí les dificoltés te familia tres l'acompagnamënt, la consulënza y la formaziun. Chisc é ince i obietifs dl proiet "Renforzé les families" invié ia dala Provinzia che tol ite trëi tematiches: la separaziun y le devorz, le tëmp dala gravidanza cina al terzo ann d'eté dles mitans y di mituns y la puberté. "I messun dagnora mëte danfora le bëgnsté y la defenüda dles mitans y di mituns, che é le dagní de nosta sozieté" dij Deeg.
L'assessuria Stocker tira ince l'atenziun sön les situaziuns problematiches "deache baldi él ince tl Südtirol families che ne pó nia ti pité a sües mitans y a sü mituns na dërta ciasa." Al vëgn da ponsé ales pices mitans y ai pici mituns, 59 indöt, che dl 2014 é gnüs tuc sö y ciará do tl Istitut provinzial por l'assistënza al'infanzia porvia de dificoltés te familia. "Les mitans y i mituns é la componënta plü debla de nosta sozieté y porchël ái debojëgn de na proteziun particolara. L'istitut sostëgn n'acoliënza familiara" dëida recordé Stocker. La strotöra ti pîta da dormí y proteziun ales mitans y ai mituns cina 3 agn che n'á por intant degun ambiënt familiar adaté, ales umes cun sües mitans y sü mituns y ales ëres che aspeta che é te na situaziun de emergënza soziala particolara. A chëstes ëres ti vëgnel dé sostëgn te süa funziun da genitur.
OSP
