Avalianza dles oportunités: domandes do n contribut cina ai 21 de dezëmber
La Provinzia conzed contribuc por la realisaziun de proiec che sostëgn la formaziun y l’ajornamënt dles ëres, la sensibilisaziun dl’opiniun publica sön la tematica dl’avalianza dles oportunités y la cultura feminina. Les domandes do n contribut pó gní presentades cina ai 21 de dezëmber pro l’Ofize Sorvisc Ëres dla Provinzia.
I contribuc vëgn finanziá danter l’ater por promöie proiec che contribuësc a mioré la situaziun iuridica dles ëres, por sostigní l’avalianza danter l’ëra y l’ël te vigni setur sozial y dantadöt por ci che reverda l’avalianza de dërc sön le post de laur y tl’economia. Por la realisaziun de proiec pól insciö gní conzedü n contribut danter le 50 y le 70 porcënt dles spëises pormetüdes. Al pó fá domanda dötes les organisaziuns feminines che á süa sënta tl Südtirol y che fej ativités tl teritore provinzial, grups y scomenciadies de ëres sciöche ince strotöres y ënc privac cun la sënta tla Provinzia de Balsan y che á sciöche fin detlaré l’avalianza danter ël y ëra y che ne á degügn fins de davagn.
Les diretives, la modulistica por les domandes y les ajuntes é desponibles sot ala misciun dla Rëi zivica dl Südtirol sot a „Contribuc por proiec tl ciamp dl’avalianza dles oportunités” http://www.reizivica.bz.it/la/sorvisc/sorvisc-categories.asp?bnsvf_svid=1004621.
Les domandes mëss gní dades jö cina ai 21 de dezëmber dl 2015 tres na lëtra racomandada cun n avis de surandada o pó gní presentades diretamënter al Ofize Sorvisc Ëres, Repartiziun provinziala Laur tla strada via Dante 11 a Balsan. Por plü informaziuns prëibel contaté le Sorvisc Ëres, tel. 0471 416950, email serviziodonna@provincia.bz.it.
rc
