18ejimo De di Cronisć – Mussner „Le cronist é la memoria dl paisc“
Por se dé jö cun i avenimënc y le svilup dles localités dl Südtirol s’á incunté incö, vëndres ai 20 de novëmber, söporjö 100 cronisć en gaujiun dl 18ejimo De di Cronisć dl Südtirol. L’assessur Florian Mussner á rengrazié i cronisć por so laur de racoiüda volontar por i paisc dla Provinzia y ti á surandé n’onoranza por i gragn miric te chësc setur ince a siur Christian Moroder.
L’assessur Florian Mussner á descrit i cronisć sciöche memories di paisc che é le cör dles comunités y che contribuësc cun sües inrescides y documentaziuns da cherié na memoria coletiva dla storia dl Südtirol y dles valades desvalies. L’assessur Florian Mussner á ince alzé fora dantadöt l’impëgn di cronisć pro la racoiüda, l’analisa y la documentaziun dles informaziuns che cunta dla storia y dl svilup di paisc y dles localités.
„Ince chësc ann é le De di Cronisć sté n’ocajiun ideala por s’incunté danter i cronisć y por baraté fora informaziuns, esperiënzes y idees“, á sotligné la direturia dl Archif provinzial y la direturia aministrativa dla Repartiziun Bëgns culturai Christine Roilo. La cronista provinziala Rita Thaler Wieser á descrit le laur di cronisć di ultims mëisc y á sotligné la buna colaboraziun cun les biblioteches y danter i cronisć. I salüc di cronisć dal Tirol é gnüs portá dant dal cronist dl Land Tirol Helmut Hörmann che á sotligné l’importanza dl svilup dla digitalisaziun che porta para n gröm de poscibilités nöies mo ince tröp de nü da imparé.
Tratan la manifestaziun él ince gnü premié de plü cronisć cun de gran miric tl setur dla cronica, danter l’ater él ince gnü onoré siur Christian Mororder che á dé fora na seria de publicaziuns y revistes por ladin. Moroder á ince manajé por cinch dejenars le Calënder de Gherdëina y á fat la traduziun de tröc tesć liturgics tl ladin. Öna dles traduziuns plü amples de siur Christian Moroder é stada la realisaziun de na verjiun ladina dla Sacra Scritöra. L’onoranza ti é gnüda surandada dal assessur Florian Mussner, la laudatio por siur Christian Moroder de 92 agn é gnüda portada dant da Giovanni Mischí che á recordé che le lingaz y la cultura ladina ti é tres stá dër a cör al autur y che cun sües publicaziuns ál contribuí dër tröp a valorisé le ladin al intern dl monn dla dlijia.
Implü él ince gnü onoré incö i cronisć Martha Krapf Schrott da Kollmann, Erwin Lona da Margreid, Werner Fuchs da Sterzing, Serafin Bacher da Rein, Richard Furggler da St.Johann tla Val de Türesc, Georg Gamper da Balsan, Walburg Ladurner Kiem da Algund y Robert Kaserer da Kastelbell-Tschars.
Tl zënter dl 18ejimo convëgn di cronisć él sté les sfidades atuales, che reverda ince la digitalisaziun dles croniches y la poscibilité da lauré cun l’internet. Margot Pizzini dl Archif provinzial á tigní n referat sön la tematica „La relaziun danter la cronica y le svilup di media digitai“. Peter Zelger dl Consorz di Comuns á tigní na relaziun sön la tematica dl sistem da salvé documënc online „OwnCloud“ y le cronist da Auer Martin Crepaz á dé consëis sön le laur pratich cun i sistems nüs dla rëi digitala.
rc
Galaria dales fotografies
d.m.c.: Margot Pizzini, Martha Krapf Schrott, Rita Thaler Wieser, Christian Moroder, Erwin Lona, Werner Fuchs, Serafin Bacher, Richard Furggler, Georg Gamper, Chronistin Walburg Ladurner Kiem, Robert Kaserer, Christine Roilo y l'assessur Florian Mussner
