Presentaziun Unités didatiches por la scora alta ai 30 de novëmber
Le Ciamp Inovaziun y Consulënza tl Departimënt Educaziun y Cultura ladina inviëia düc i interessá ala presentaziun dles unités didatiches nöies de ladin por la scora alta en lönesc, ai 30 de novëmber dl 2015, dales 15.00 tl Museum Ladin Ciastel de Tor. Ala presentaziun tolarál ince pert l’assessur ladin Florian Mussner, l’intendënt Roland Verra y le diretur Felix Ploner.
Tl cheder dla produziun de materiai didatics nüs por les scores altes á le Ciamp Inovaziun y Consulënza arjigné ca 6 unités didatiches nöies por ladin. Ara se trata de materiai didatics nüs sön la storia di Ladins dal 1850 cina aldedaincö y de un n sföi sön la storia dl film, olache al vëgn ince dant na personalité ladina. „La publicaziun de material didatich nü sön la storia y la cultura ladina é na sbürla importanta por döt le sistem scolastich da se dé jö cun nosta realté locala ince te scora y pó ester n impuls ince por nüsc scolars y nostes scolares da s’informé sön sü antenac y sön i avenimënc sozedüs chiló da nos dan da plü da dî“, dij l’assessur por la cultura ladina Florian Mussner.
Le Ciamp Inovaziun y Consulënza tl Departimënt Educaziun y Cultura Ladina organisëia insciö la presentaziun di materiai nüs por l’insegnamënt dl ladin tla scora alta
en lönesc, ai 30 de novëmber dl 2015
dales 15.00
tla sënta dl Museum Ladin Ciastel de Tor
strada Tor 65
San Martin de Tor
adöm cun i auturs y les auturies che portará dant i contignüs y dará spligaziuns sön l’adoranza te scora, cun l’assessur Florian Mussner, l’intendënt Roland Verra y le diretur dl Ciamp Inovaziun y Consulënza Felix Ploner. La storica Luciana Palla da Fodom acompagnará y spligará ince tratan le domisde la mostra: "1914-1918" da odëi tl Museum Ladin. Düc é inviá a tó pert, dantadöt les insegnates y i insegnanc dla scora alta y mesana, y düc chiche é interessá ala storia y cultura ladina. La manifestaziun vëgn reconesciüda ai fins dl ajornamënt. Plü informaziuns sön pedagogich.it
rc
