Scomenciadies por le De cuntra la violënza sön les ëres
Les scomenciadies organisades a livel provinzial por recordé le De mondial cuntra la violënza sön les ëres é gnüdes presentades incö ai 23 de novëmber a Balsan. Öna dles mosöres prinzipales é por l’assessuria provinziala por l’avalianza dles oportunités Martha Stocker la prevenziun.
Le De internazional por l’eliminaziun dla violënza cuntra les ëres vëgn recordé dal 1981 inant ai 25 de novëmber y tratan chësc de vëgnel organisé tradizionalmënter dala Comisciun por l’avalianza dles oportunités tröpes scomenciaides en colaboraziun cun atres assoziaziuns cun l’obietif da sensibilisé l’opiniun publica sön chësta tematica.
Les scomenciadies organisades por recordé le De internazional por l’eliminaziun dla violënza cuntra les ëres é gnüdes presentades incö, lönesc ai 23 de novëmber, dal’assessuria provinziala por l’avalianza dles oportunités Martha Stocker adöm ala presidënta y vizepresidënta dla Comisciun provinziala por l’avalianza dles oportunités, Ulrike Oberhammer y Franca Toffol, y dala coordinadëssa dl grup de laur dla Comisciun Rolanda Tschuggel.
L’assessuria provinziala Martha Stocker á recordé che la violënza cuntra les ëres á de plü aspec, da chël economich a chël psicologich, da chël sessual a chël fisich y tl Südtirol él atoche l’11 porcënt dles ëres y indöt le 20 porcënt dles ëres dai 18 ai 39 agn. Por smendrí chëstes porzentuales él la Provinzia de Balsan che á istituí i Zëntri cuntra la violënza y les Ciases dles ëres y sorvisc sozio-sanitars. I dötadöm 100 posć por dormí a desposiziun tles Ciases dles ëres dla Provinzia é gnüs adorá tratan le 2014, te periodes desfarëntes, da indöt 578 ëres. Por chësc sorvisc mët la Provinzia a desposiziun indöt n sostëgn finanziar de 1,8 miliuns de euro. Öna dles mosöres fondamentales cuntra la violënza, insciö l’assessuria Stocker, é le plann provinzial de prevenziun che gnará presenté indoman, ai 24 de novëmber. N contribut important vëgn ince dales manifestaziuns metüdes a jí por smendrí la violënza y che contribuësc a porté para mudaziuns soziales, ince da pert de movimënc di ëi.
La coordinadëssa dl grup de laur dla Comisciun, Tschugguel, á sotligné che la violënza cuntra les ëres é n fenomen che á sües raisc tla sozieté, ince sce les formes se müda, é le fenomen che s’ampliëia. La vizepresidënta dla Comisciun provinziala por l’avalianza dles oportunités Toffol á recordé l’importanza dl De internazional cuntra la violënza sön les ëres dantadöt ince sciöche mosöra por sensibilisé l’opiniun publica. L’educaziun abonora y la formaziun di operadus te chësc setur é döes aziuns de prevenziun importantes che vëgn ince sostignides te na manira adatada dala man publica tl Südtirol, insciö Toffol. La presidentëssa dla Comisciun provinziala por l’avalianza dles oportunités Ulrike Oberhammer á recordé che le 73 porcënt dles ëres (sön trëi miliarg de porsones che adora internet) á detlaré, aladô de n’inrescida atuala dles Naziuns Unides, de ester stades n iade vitimes de violënza sön internet. Plü manaciades é les ëres danter i 18 y i 24 agn. Les ataches é gonot anonimes y les vitimes ne capësc nia da olache ares vëgn. Ala violënza online ti dijon porchël ince „violënza chita“. Les vitimes dla violënza sön internet scuta gonot ciodiche ares se doda y chësc aumentëia ciamó deplü le risch che an vëgnes tres indô atacades.
L’ediziun nöia dla revista „ëres – Fraueninfodonne" che é gnüda presentada incö trata propi la tematica dla violënza cuntra les ëres sön internet, olache al vëgn ince splighé mosöres de proteziun y la poscibilité da fá straufunghes online. La Ëres nöia é online y pó gní desćiariada dala plata web http://www.provinz.bz.it/chancengleichheit/themen/eres.asp o apostada por telefonn al numer 0471 416950 o por mail sot ala misciun frauenbuero@provinz.bz.it y é a desposiziun sön papier tl Ofize dles Ëres tla Strada Dante 11 a Balsan. Consëis ütli de sciöche an dess se comporté cun chëstes formes nöies de violënza ciafon ince tla „Gitschn App – App per ragazze“ che é bele gnüda desćiariada passa 2.00 iadi.
L’App ne trasmët nia ma informaziuns importantes ales mitans, mo á ince de plü numeri de emergënza por cherdé aiüt te na situaziun prigorosa. Implü pita la App na funziun SOS che fej pié ia n signal acustich y otich. L’App debann pó gní desćiariada tl App Store, pro Google Play o sot a chësc link: http://www.provinz.bz.it/chancengleichheit/themen/app.asp.
Por dé n sëgn tler cuntra la violënza tol pert le Consëi provinzial por l’Avalianza di Dërc ince ala campagna inviada ia dala revista online „La Grande Testata – Posto occupato“. Por mostré che vigni ëra pó ester vitima dla violënza y che ara ne pó porchël nia plü tó pert ala vita publica gnarál tl dagní da vigni manifestaziun dl Consëi lascé n post lëde.
Al é oramai tradiziun da tó pert ala campagna mondiala dles vëtes blances, nasciüda dl 1991 tl Canada por orenté de n grup de ëi. Por chësc fin ti él gnü mené tles ultimes edemes les vëtes ai politics, ai dirigënc y ai presidënc dles uniuns y dles assoziaziuns cun l’invit ai ëi de sostigní chësta campagna y de se vistí les vëtes tla spana de tëmp che vá dai 25 de novëmber ai 10 de dezëmber dl 2015 (De mondial di dërc umans) sciöche sëgn tler de n’orëi mai ti fá violënza a n’ëra, de ne toleré nia che ara vëgnes fata y de se sforzé de se dé da fá cuntra la violënza ales ëres.
En gaujiun dl de cuntra la violënza ales ëres vëgnel ince en chësc ann indô publiché la cronica cuntra la violënza che contëgn articui y relaziuns fora dla stampa locala sön chësc argomënt.
Chësta cronica pó gní desćiariada sot a chësc link: http://www.provinz.bz.it/chancengleichheit/themen/gewaltchronik-2015.asp.
Le Consëi sará ince presënt cun so material informatif dal conzert cun Greta Marcolongo AcousticAmore, che gnará tigní en sabeda, ai 28 de novëmber dl 2015 dales 20.30 tl Neues Theater da San Iaco (Laives). Dal conzert vëgnel mostré le video „Malo“, dediché al argomënt dla violënza ales ëres y che é gnü a se le dé tl cheder de n proiet dl Consëi por l’Avalianza di Dërc da Laives.
Les scomenciadies en gaujiun dl De cuntra la violënza ales ëres se stlüj jö cun la sëra teatrala „Il rifugio – Wenn die Nacht keine Tür hätte, woher käme der Tag“, metü a jí en colaboraziun cun le sorvisc Ciasa dles Ëres da Maran. Les ëres che vir tla Ciasa por les Ëres da Maran á tut pert a n workshop olache an á fat belaita, improvisaziuns y olache an s’á baraté fora informaziuns. Fora de chëstes incuntades él garaté n teater fat cun les jobleres Johanna Porcheddu y Christina Khuen. Tres les esperiënzes y i recorc personai dles ëres, arichis cun dac y fac, y completá cun les minunghes dles colaboradësses dl Sorvisc por les Ëres prón de ti trasmëte ales porsones che tol pert n cheder dla violënza da vigni de sön les ëres y de sü tentatifs de ciafé na soluziun. Le teater vëgn porté dant por talian y por todësch. La sëra teatrala sará en lönesc, ai 30 de novëmber dl 2015 dales 20.30 tl Pice teater dl Carambolage, tla Silbergasse 19, a Balsan. Por mirit dla bona colaboraziun cun le Pice Teater dl Carambolage é la entrada debann. Al vëgn perié de se prenoté diretamënter tl Carambolage sot a: www.carambolage.org.
De plü informaziuns sön dötes les ativités en gaujiun dl de cuntra la violënza ales ëres él da ciafé sön la plata internet dl Consëi por l’Avalianza di Dërc y dl Ofize dles Ëres sön le link http://www.provinz.bz.it/chancengleichheit/themen/25-november-2015.asp. Por de plü informaziuns prëibel contaté l’Ofize dles Ëres: Strada Dante 11, 39100 Balsan, tel. 0471 416950.
Les ëres vitimes de violënza ciafa aiüt tl Südtirol sot al numer de telefon 800 276 433 (Ciases dles ëres).
Abitaziuns sigüdes Balsan: 800 892 828
Ciasa dles ëres Maran: 800 014 008
Ciasa dles ëres Porsenú: 800 601 330
Abitaziuns sigüdes Bornech: 800 310 303
Dlungia le poscibilités de contat por les ëres vëgnel ince organisé trainings cuntra la violënza por i ëi, che vëgn metüs a jí dal Ofize por la Sconanza di mëndri y l'intlujiun soziala y dala Caritas. Informaziuns pon ciafé al numer de tel. 0471 324649.
rc
