Kompatscher a Viena: renforzé y svilupé l’autonomia adöm cun l’Austria

Sön l’agenda politica dles incuntades de Viena él sté por le presidënt Arno Kompatscher incö (ai 23/11) le dagní dl’autonomia südtiroleja y i proscims vari da fá do la reforma dl titul V dla Costituziun taliana. Chësc é sté le contignü dles incuntades de consultaziun dl presidënt Kompatscher, adöm al assessur Philipp Achammer, cun le presidënt de Stat Fischer, le vize-canzelier Mitterlehner y le minister por l’Ester Kurz. Kompatscher á sotligné che l’impostaziun dla reforma costituzionala da pert dl Stat é falada, mo al á splighé che do na seria de tratatives él sté meso da mioré la clausola de proteziun, che scona l’autonomia südtiroleja da efec dl zentralism dla reforma. Le Statut atual resta insciö en forza cina ala revijiun cun n'acordanza damperfora cun la Provinzia. Na revijiun che gnará ma aprovada dala Provinzia sce la proteziun di diric atuai é garantida deplëgn, cun ince l’ancoraje internazional dl’autonomia speziala. „L’aprovaziun dla Provinzia ala revijiun dl Statut gnará ma dada sce al sará ince gnü a se le dé denant n’aprovaziun da pert dla Republica dl’Austria, le Stat che á firmé l’acordanza de Paris y che á ince la funziun de proteziun dl Südtirol“, á ajunté Kompatscher.

La revijiun dl Statut, sön chëstes fondamëntes, á ince na süa logica – á ajunté Kompatscher – deache le Statut atual ne é nia plü coordiné dal test dla Costituziun taliana, che é gnü mudé plü iadi cun le resultat da porté para poscibilités de interpretaziun y de sentënzes dla Curt costituzionala che mët en prigo l’atuaziun de competënzes garantides dal’autonomia südtiroleja. „N prinzip dl’acordanza tratan la revijiun dl Statut nes pormët da formulé danü le catalogh dles competënzes autonomes dla Provinzia y da evité insciö le prigo de intervënc da pert dla Curt costituzionala. Chësc nes consënt da prezisé y sconé damí les competënzes nöies y chëres smendrides da sentënzes dla Curt. L’integraziun formala dl’Austria pormët implü da renové l’ancoraje internazional y da le fá avarëi ince por mudaziuns tl dagní cun desposiziuns legislatives“, á stlüt jö Kompatscher.

Le presidënt Fischer y i ministri Mitterlehner y Kurz á assiguré che l’Austria garantirá inant le sostëgn al Südtirol sciöche preodü dala funziun de sconanza y cun le fin da avëi por la revijiun dl Statut na basa de garanzia legislativa internazionala. Le presidënt Fischer á recordé che les tratatives sön la reforma costituzionala vëgn dötaurela portades inant y che l’Austria ejaminëia chësc prozés cun atenziun. Le minister por l’ester Kurz á dit de ester confidënt che al pois gní ciafé na soluziun nia ma por garantí l’autonomia südtiroleja tl cheder dla reforma costituzionala taliana, mo ince por la svilupé inant cun suzés.