Dala Junta: varianta Val de Riga, STA inciariada cun la proietaziun
La Junta provinziala á aprové incö (ai 24 de novëmber) le schema de convenziun che regolëia les modalités dles proietaziuns dl coliamënt danter la linia dla ferata de Puster cun chëra dl Prener. Le finanziamënt de 1,5 miliuns de euro vëgn dal program de mosöres de compensaziun ambientales por la realisaziun dl tunel de basa dl Prener.
N coliamënt diret dla linia dla ferata de Puster cun chëra dl Prener, n adatamënt dl zënter intermodal de Porsenú, tëmps plü cörc te Puster: le proiet denominé “Varianta Val di Riga” danter Mühlbach y le coliamënt ala linia dl Prener tres Schabs y Vahrn portass pro a vantaji importanc por pendolars y utënc dla ferata en general.
La Junta provinziala á porchël aprové n ater vare important tla proietaziun de chësc coliamënt: le presidënt Arno Kompatscher é gnü inciarié dala Junta da sotescrí na convenziun cun “Rete Ferroviaria Italiana” (RFI), “”Galleria di Base del Brennero (BBT)” y “Strutture Trasporti Alto Adige” (STA) che definësc l’elaboraziun de n proiet preliminar por la Varianta Val di Riga. “Cun chësta intenüda vëgn la STA inciariada da fá la proietaziun preliminara, che tol ince ite la redaziun dl stüde de fatibilité, le relevamënt plano-altimetrich dl teritore interessé dai intervënc, inrescides, proes söl post y te laboratore, per ester bugn da elaboré n proiet esecutif suandënt”, sotrissëia l’assessur provinzial por la mobilité Florian Mussner.
Concretamënter tol ite l’intervënt la proietaziun dl coliamënt denominada “Variante Val di Riga” danter Mühlbach y le coliamënt ala linia dl Prener, l’adatamënt dl plan regoladú general dla staziun y dl zënter intermodal de Porsenú y la realisaziun dles fermades nöies de Vahrn y eventualmënter de Schabs. N grup de laur metü adöm da Provinzia y RFI coordinëia i laurs, che an messará stlü jö te 450 dis dala sotescriziun dla convenziun. Por düc i intervënc che reverda la proietaziun él preodü 1,5 miliuns de euro, “mo ai ne pesará nia sön le bilanz provinzial, ajache ai messará gní metüs a desposiziun dala BBT SE tl cheder dl program de mosöres de compensaziun por la costruziun dl BBT”, spliga Mussner.
OSP
