Dala Junta: sön les dependënzes renovades les convenziuns cun l'Austria
La Junta provinziala á tut la dezijiun incö da renové la colaboraziun cun i trëi istituc dl’Austria che é spezialisá tl tratamënt de patologies gravëntes dla dependënza da alcol y da medejines y tles problematiches coliades. Les convenziuns spezifiches é gnüdes renovades incö ai 24 de novëmber dala Junta.
I paziënc dl Südtirol che patësc de formes de dependënza gravëntes podará se curé ince tl dagní te istituziuns austriaches spezialisades cun n’eperiënza ampla y lungia te chësc setur. La Junta provinziala á insciö renové por i proscims trëi agn les convenziuns cun l’assoziaziun „Kontakt- Information-Therapie-Rehabilitationseinrichtung (KIT)“, la Diakonie dl Tirol dl Ost y la Therapienetz srl. „Cun le prozes de reforma dla sanité é nosc obietif chël da amplié y renforzé la rëi d’assistënza por porsones che á patologies gravëntes de dependënza“, sotlignëia l’assessuria provinziala Martha Stocker. Cina l’atuaziun dla reforma gnarál indere confermé dötes les colaboraziuns che funzionëia bun danter la Provinzia de Balsan y i istituc convenzioná tl’Austria, a chi che l’assessuria Stocker ti fej n rengraziamënt por l’assistënza infermierstica y de terapia che ti é gnüda assigurada ai paziënc dl Südtirol cina sëgn.
L’assoziaziun KIT garantësc insciö l’assistënza por porsones dla majera eté cun problems de na maladoranza de sostanzes proibides y d’atres dependënzes te na strotöra aposta cun na cura de dorada lungia. La convenziun cun la Provinzia de Balsan vá zoruch al ann 1992, ti ultims 8 agn él gnü tut sö indöt set paziënc dal Südtirol. L’ospedal spezialisé „De La Tour“ cun süa sënta a Treffen (Tirol dl Ost) se fistidiëia dla cura y reabilitaziun de porsones che patësc de maladoranza y de dependënza de alcol y che á na convenziun cun la Provinzia de Balsan dal 1989. La strotöra dla Therapienetz srl a Maurach dl Tirol se crüzia dla cura y reabilitaziun, cun sojornanzes cörtes, de porsones che patësc de maladoranza o de dependënza da sostanzes proibides. La convenziun cun la Provinzia á valüta dal 2000 inant, ti ultims 8 agn él jü en cura indöt 16 paziënc dal Südtirol.
rc
