Dala Junta: fujiun SEL-AEW, dui vari inant
Al vá inant le percurs de definiziun de düc i aspec che reverda la fujiun danter SEL Spa y AEW Spa. La Junta provinziala á dé incö (ai 24 de novëmber) süa aprovaziun ai proscims dui vari tl prozes de reorganisaziun dl setur dl’energia tl Südtirol: da öna na pert la prorogaziun dl termin dla conclujiun dl’operaziun de fujiun, dal’atra pert l’aprovaziun dles condiziuns stabilides dal’Antitrust.
Tl mëis de forá de chësc ann â la Junta provinziala aprové, cun düc i atri cater partners interessá, l’acordanza cheder por la fujiun dles sozietés energetiches SEL y AEW. L’intenüda regolamentëia düc i vari y les condiziuns dla prozedöra defujiun y stabilësc ince la contlujiun dl’operaziun cina ai 30 de novëmber dl 2015.
„Por fá a na manira da aprofondí ciamó avisa düc i punc en discusciun él incö gnü stabilí da sposté de n mëis chësc termin de conclujiun“, á splighé incö ai 24 de novëmber le presidënt Kompatscher tratan la conferënza stampa do la sentada dla Junta. Chësc deache al mëss ciamó gní stlüt jö n valgönes tratatives danter SEL Spa y l’Agenzia dles entrades por ci che reverda relevaziuns fiscales scomenciades tl 2013, „na relevaziun che é bele rovada a n bun punt“, á ajunté Kompatscher. La prorogaziun ai 31 de dezëmber dl 2015 por le „closing“ dla fujiun é gnüda stabilida en acordanza cun düc i partners dl contrat.
Na condiziun che vëgn lapró ciamó da ademplí por la fujiun SEL-AEW reverda indere l’arat positif dl’Antitrust. Tl’acordanza cheder él insciö scrit che na condiziun por la fujiun é l’aprovaziun dl’Autorité dla concorënza y dl marcé, che d’isté â dé n’aprovaziun condizionada ala aziënda nöia: les mosöres dades dant dal’Antitrust á l’obietif da evité la presënza de posiziuns dominantes ti marciá dla venüda y dla destribuziun dl gas natural. Al é insciö gnü scrit dant la venüda de un di seturs dl’aziënda de SELGAS sciöche ince dles cuotes de partezipaziun dla SEL y di Comuns de Balsan y Maran tla SELGASNET tres la comproprieté atuala de cuotes de partezipaziun tla SELFIN. Cun la deliberaziun da incö á la Junta provinziala azeté formalmënter chëstes condiziuns.
„Les dezijiuns tutes dala Junta incö é de natöra tecnica y iuridica, mo ares é ince vari importanc tl vers dla realisaziun de nüsc obietifs de reorganisaziun dl setur energetich tl Südtirol“, á sotligné l’assessur Richard Theiner. Da öna na pert por ci che reverda la fujiun danter SEL y AW cun n renforzamënt di Comuns tl marcé local dl’energia, dal’atra pert porta para chësc vare la creaziun de posć de laur implü y ti garantësc ala popolaziun la segurëza plü alta poscibla por ci che reverda le refornimënt de energia, stlüj jö Theiner.
rc
