Dala Junta: coliamënt danter Puster y Ampëz, ok al stüde de fatibilité
Por promöie na mobilité tres plü sostenibla danter le Ciadura y l’Alta Val de Puster ó la Junta provinziala realisé n coliamënt dla ferata. Incö, mertesc ai 24 de novëmber, á la Junta provinziala stabilí l’aprovaziun de n protocol d’intenüda cun la Regiun Venet che prevëiga la realisaziun de n stüde de fatibilité por l’ativaziun de na linia dla ferata.
Colié cun na ferata le Südtirol cun le Venet, plü avisa danter le Ciadura y l’Alta Val de Puster: chësc é un di obietifs dl’acordanza sotescrita bele dl 2014 danter les Provinzies de Balsan y de Trënt, les Regiuns Lombardia y le Venet, cun le Minister dl’economia y dles finanzes y le Minister por i afars regionai. „Le gran valur dla contrada dl raiun – á sotligné l’assessur por la mobilité Florian Mussner – y la presënza de tröc turisć é dui argomënc de gran valüta por investí te n coliamënt cun ferates che ne portass nia ma para vantaji por l’ambiënt mo foss ince n’alternativa implü por la popolaziun y i ghesć dl raiun.“
Mo nia ma l’aspet dl ambiënt é gnü sotligné dal assessur Mussner pro la presentaziun dl’aprovaziun da pert dla Junta dl stüde de fatibilité dl proiet de coliamënt feroviar. „Cun na linia dles ferates nöia ne gnissel nia ma mioré la poscibilité da arjunje chisc dui raiuns dles Alpes zënza conseguënzes por l’ambiënt, mo al podess ince gní revaluté döta l’area dai punc de odüda dl turism, dl’economia y dla cultura.“La deliberaziun aprovada incö (24 de novëmber) dala Junta provinziala ti dá l’autorisaziun al presidënt Arno Kompatscher da sotescrí le protocol d’acordanza danter la Regiun dl Venet y la Provinzia de Balsan che prevëiga n stüde de fatibilité por n coliamënt Aunejia-Cortina-Alta Val de Puster sciöche pröm vare de n percurs lunch de analises.
„Al gnará ince istituí n gup de laur – á anunzié Florian Mussner – de chël che al fajará pert rapresentanc dles döes istituziuns dla STA (Strotöres Trasport Südtirol) y dla ST (Sistems dl teritore), che ará l’inciaria da definí les diretives, le plann d’esecuziun y i cosć eventuai. Le coordinamënt dl grup de laur, che messará presenté vigni sis mëis na relaziun, ti gnará surandé naôta por le pröm ann y mez al Venet y spo daldô al Südtirol. Les ressurses nezesciares por scomencé le proiet gnará metüdes a desposiziun dala Uniun europeica tres n proiet Interreg y dal Fonds por i comuns confinanc.“
rc
