Dala Junta: n vare inant por le palaz provinzial nü a Balsan
La prozedöra urbanistica por la costruziun dl palaz provinzial nü tla strada via Renon a Balsan á fat n vare important inant. La Junta provinziala á dé arat positif al plann d’atuaziun dl proiet y che é la basa urbanistica por la realisaziun dl’opera. „Sön dorada lungia sarál poscibl da sparagné tröpes spëises, ince por l’eliminaziun di cosć d’afit atuai“, insciö le presidënt Kompatscher.
Atualmënter é i ofizi dla Repartiziun Personal sistemá al’intern de n palaz tla strada via Renon a Balsan che la Provinzia á tut adinfit. „I cosć é dër alc – á spilghé le presidënt Kompatscher – cun n pëis finanziar de cina 800.000 euro al’ann.“ L’idea dla Provinzia ê insciö bele dal 2009 inant da cumpré i frabicac cun i numers 5, 7 y 9 dla strada via Renon por realisé n palaz provinzial daldöt nü. „Cun n frabicat nü de proprieté dla Provinzia fossel meso da sparagné tröc cosć y i investimënc por la costruziun dl'opera rovass te püc agn a ester valis cun le pëis finanziar dl afit“, á splighé Kompatscher.
Incö (24 de novëmber) á la Junta provinziala insciö aprové, sön proposta dl assessur Richard Theiner, le plann d’atuaziun dl’area por strotöres suracomunales: al se trata de n vare urbanistich nezesciar por podëi sëgn mët man cun la proietaziun dl’opera sön la basa de n concurs d’idees davagné dai architëc Davide Scagliarini y Orazio Basso. „La dezijiun da incö é gnüda tuta en acordanza cun les osservaziuns dl Comun de Balsan y sön la basa dla valutaziun dla comisciun provinziala natöra, paesaje y svilup dl teritore.“
rc
