Adatamënt dla reforma scolastica: Sëres de dialogh a Urtijëi y San Martin
D’isté él gnü aprové la reforma scolastica cun la lege „La Buona Scuola“ che gnará sëgn adatada ales leges provinziales. Por fá chësc vare deboriada inviëia l’assessur Mussner y l’intendënt Verra döt le personal didatich, i rapresentanc di geniturs y studënc a döes sëres de dialogh a Urtijëi (03/12) y San Martin (10/12) por informé en cunt di mudamënc che gnará a s'l'dé tl sistem scolastich ladin.
La lege 107/2015 se tol dant de amplié l’autonomia dles scores cun la definiziun de n plann trienal dl’oferta formativa, de renforzé l’ativité de ajornamënt di insegnanc y de potenzié les competënzes di direturs y dles direturies dles scores. Por ci che reverda la didatica é les maius novités dla reforma la poscibilité da adoré personal spezialisé tles scores elementares (por ejëmpl por les materies de sport, musiga y inglesc), aziuns cuntra l’arbandonn scolastich y l’introduziun de n portfolio personal de vigni studënt por documenté le percurs scolastich.
Do l’aprovaziun dla lege „La Buona Scuola“ da pert dl Parlamënt ai 9 de messé dl 2015 mëss la normativa nöia sëgn gní adatada ales desposiziuns provinziales tl setur dla scora. De chësc vers é les trëi Intendënzes scolastiches de Südtirol atualmënter tl laur da elaboré propostes de mudaziun al cheder legislatif provinzial.
Te chësc contest mët l’assessur Florian Mussner y l’intendënt Roland Verra a jí döes sëres d’informaziun y discusciun dal titul „La reforma nazionala dla scora (lege 107/2015, “La Buona Scuola”), so adatamënt ala normativa provinziala y les novités por le sistem scolastich ladin“.
La pröma sëra de discusciun y informaziun sará
en jöbia, ai 03 de dezëmber
dales 20:00
tl’Aula Magna dl ITE Raetia
strada Raetia 295
a Urtijëi.
La moderaziun sará de Lois Kastlunger, la partezipaziun vëgn reconesciüda sciöche ativité de formaziun dl personal dles scores y scolines.
La secunda sëra de discusciun y informaziun sará
en jöbia, ai 10 de dezëmber
dales 20:00
tl Istitut Ladin “Micurá de Rü”
a San Martin de Tor.
La moderaziun sará de Lois Kastlunger la partezipaziun vëgn reconesciüda sciöche ativité de formaziun dl personal dles scores y scolines.
Le documënt lauré fora dales trëi Intendënzes scolastiches gnará spo ejaminé dal Consëi scolastich provinzial y dala Junta provinziala y rovará spo tl Consëi provinzial por la discusciun y l’aprovaziun.
rc
