Mobilité y aeroport: la Junta informëia i partners soziai
I aspec desvalies che reverda la mobilité te Südtirol, cun ince la plaza di fligri da Balsan, é stá tl zënter incö (ai 26 de novëmber) de n’incuntada a Balsan danter le presidënt dla Provinzia Arno Kompatscher y l’assessur por la mobilité Florian Mussner cun i partners soziai y les assoziaziuns de categoria.
Le punt prinzipal dla presentaziun da incö, ai 26 de novëmber, a Balsan é sté le plann provinzial dla mobilité elaboré dala Junta provinziala y che reverda les formes desvalies de mobilité, dales rodes ales corieres publiches, dales ferates ai fligri. L’incuntada ne á nia albü tl zënter la debatüda sön le dagní dla plaza di fligri, „mo al é sté n’ocajiun por ti splighé ai sindacac y ales assoziaziuns cai che é nüsc obietifs tl setur dla mobilité, sciöche i ún svilupá y co che i ponsun da i mët en pratica“, á dit le presidënt Kompatscher. L’assessur Mussner á presenté les dezijiuns plü relevantes tutes dala Junta provinziala en mertesc (ai 24/11) y che reverda le potenziamënt dla mobilité transfrontaliera cun i coliamënc danter la Val de Puster tres Ampëz cina la Ciadura, le coliamënt cun les corieres danter la Val Venosta y la Svizera y l’aprovaziun de n proiet de planificaziun por la costruziun dla varianta dla Val de Riga. „Nosc impëgn é chël da amplié y renforzé i coliamënc cun i raiuns vijins y che ne reverda nia ma la costruziun dl tunel de basa dl BBT y sües trates d’azes, mo ince i stüdi de fatibilité por coliamënc dala Venosta cun la Lombardia y la Svizera y dala Val de Puster cun le Venet. Te chësc conzet general de mobilité él ince important da avëi n aeroport che funzionëia bun“, á splighé Mussner.
Le diretur dla Repartiziun Mobilité Günther Burger á presenté i vari fac inant te chësc setur ti ultims diesc agn: la modernisaziun dles infrastrotöres y dles staziuns dles ferates, l’aumënt di iadi, l’ampliamënt dla rëi dles corieres publiches y di citybus, l’introduziun dl Südtirol Pass cun passa 133mile anuzadus y anuzadësses. Y implü ince ciamó la realisaziun de na rëi sura döta la Provinzia de trus dla roda, la promoziun de proiec de mobilité sostenibla y i coliamënc cun les regiuns vijines.
Ai partners soziai y ales assoziaziuns presëntes ti él spo gnü presenté le plann strategich lauré fora dal'ABD, la sozieté che á en gestiun la plaza di fligri da Balsan. Danter i obietifs zentrai por avëi n aeroport regional che funzionëia sön dorada lungia él da ciafé le coliamënt cun cater gran destinaziuns internazionales dl trafich di fligri, ester na sauridanza y alternativa importanta por porsones che vëgn te Südtirol por fá vacanzes ince ma por n cört tëmp sides dala Talia co da foradecá, y ince por porsones che vëgn te Südtirol por rajiuns de laur y/o cultura. Aladô dles previjiuns cun ma le 50 porcënt di jori implü sarál poscibl da manajé cina le 2035 n numer de passajiers diesc iadi tan gran. Le presidënt Kompatscher á presenté le dessëgn de lege che gnará ejaminé dal Consëi provinzial ai 20 de dezëmber. Le ddl definësc te na manira tlera i obietifs da arjunje y scri ince dant da archité le finanziamënt publich sce les indicaziuns scrites dant ne vëgn nia arjuntes, öna de chëstes é por ejëmpl le numer minim de 170mile passajiers al’ann. L’investimënt finanziar dla Provinzia preodü dal dessëgn de lege é de 2,5 miliuns de euro al ann cina l’ann 2022, daldô ne podarál nia gní superé n finanziamënt de 1,5 miliuns.
L’aeroport é na pert dla strategia generala dla Junta provinziala che reverda la mobilité, y te n monn tres plü globalisé él ince n fautur important y de cualité, á ajunté Kompatscher a inom dla Junta. Düc i stüdi á ince confermé che n ampliamënt dla pista de ateraje é nezesciar por avëi n aeroport efiziënt, „deache prësc degönes companies se anüza aldedaincö de fligri tan pici da podëi arsí.“ Le presidënt Kompatscher á dit de orëi mët la plaza di fligri sön na basa daldöt nöia y damana porchël ince la popolaziun do so arat. „Sce chësc conzet ne gnará nia sostigní spo ne gnarál nia plü investí tl aeroport y la sozieté gnará licuidada“, á stlüt jö Kompatscher.
rc
Galaria dales fotografies
