Dala Junta: Convenziuns por cuartiers por studënc a Desproch y Viena
La Junta provinziala á tut la dezijiun da stlüje jö convenziuns por resservé alplü 55 cuartiers te ciases por studëntes y studënc a Viena y 255 te convic a Desproch por sostigní jones y jogn che stüdia tl’Austria.
La Junta provinziala pó stlüje jö convenziuns tl raiun nazional o te Paîsc dl raiun cultural todësch por resservé n numer de posć da dormí por studëntes y studënc dl Südtirol te strotöres residenziales aposta. Tles convenziuns vëgnel ince fissé i criters por ti podëi pormez ai posć resservá defora dala provinzia. L’afit y les spëises che röia lapró é a ciaria dles studëntes interessades y di studënc interessá. Tl ann academich 2012/2013 êl 1564 studëntes y studënc che frecuentâ l’Univeristé de Viena y 4.071 l’Université da Desproch (dac dl’ASTAT).
"Porchël él gnü sö la orenté da pert dla Junta da sostigní les studëntes y i studënc dl Südtirol stlujon jö convenziuns por resservé alplü 55 cuartiers te ciases por studëntes y studënc a Viena y alplü 255 te convic a Desproch", á splighé incö le presidënt dla Provinzia Arno Kompatscher do la sentada dla Junta provinziala. Les convenziuns döra 10 agn alalungia a pié ia dal ann academich 2015/2016.
Na comisciun d’esperc valutará les ofertes presentades aladô de chisc criters de valutaziun: l’afit nia massa alt, la lontananza dala sënta universitara plü dlungia, le numer dles studëntes y di studënc che é stá tla strotöra ti ultimi trëi agn academics, l’ultilité publica dl ënt y le prisc che vëgn pité. I standarg minims dla strotöra vëiga danfora: na ciamena singola o alplü dopla, na ciasadafüch te ciamena o alplü öna por alzada, l’azes a internet te ciamena.
OSP
