Dala Junta:L’archirida scientifica tl setur dla neuroreabilitaziun vá inant
Les cooperaziuns che reverda les ativités d’archirida scientifica tl setur dla neuroreabilitaziun jará inant cina ala fin dl 2018: chësc á stabilí incö ( 1 de dezëmber) la Junta provinziala.
L’ativité de archirida y i proiec de sciënza scomenciá cun i partners dan da plü agn tl ciamp dla neuroreabilitaziun jará inant cina la fin dl 2018. „Ti ultims agn él gnü formé na buna basa por l’archirida scientifica y la formaziun profescionala te chësc setur“, spliga l’assessuria provinziala por la sanité Martha Stocker. I obietifs di proscims agn sará da arjunje la definiziun sciöche zënter d’archirida IRCCS („Istituto di ricovero e cura a carattere scientifico“) tl setur dla neuroreabilitaziun.
Tres la colaboraziun strënta danter l’Aziënda sanitara provinziala, la tlinica privata „Villa Melitta“, le setur de tratamënt neurologich dl ospedal de Zirl y le Zënter d’archirida de reabilitaziun neuromotoria y cognitiva (CRRNC) dl’Université de Verona él gnü concordé adöm le program dles priorités por i proscims agn: chëstes reverda i seturs dla robotica neuroreabilitativa, dl tratamënt cun medejines di paziënc de neuroreabilitaziun, dla stimulaziun eletrica funzionala y dl tratamënt dla „spastizité“. Cina l’ann 2018 messarál gní stlüt jö indöt 7 proiec.
rc
