Interreg V Talia-Austria: aprovaziun dl’UE por le program cina le 2020
L’UE á aprové le program nü de cooperaziun transfrontaliera Talia-Austria che tol ite ince la Provinzia de Balsan. L’Interreg V ará a desposiziun indöt 98 miliuns de euro cina l’ann 2020, de chisc gnará 82 dal Fonds europeich por le svilup regional. Le program nü promöi proiec d’archirida y d’inovaziun, sconanza dl patrimone natural cultural che favorësc la competitivité dles PMI.
Les regiuns che fej para al program Interreg V-A Talia-Austria é por la Talia le Südtirol, le Venet y le Friul-Aunejia-Iulia, por l’Austria él le Tirol, le Tirol dl Ost y Salzburg. L’obietif prinzipal dl program operatif nü é chël da promöie te na manira particolara la cooperaziuns danter les istituziuns tl ciamp dl’archirida, dl svilup tecnologich y dl’inovaziun, da renforzé la competitivité dles piceres impreses y chëres mesanes y da sconé le patrimone natural y cultural tres n bun coliamënt danter turism y ambiënt. „Al é gnü aprové n program de cooperaziun che mët tl zënter les esigënzes y i punc de forza dles arees vijines danter Talia y Austria y de colaboraziun danter les comunités de chësc raiun europeich ponsan sura i confins fora“, sotlignëia le presidënt dla Provinzia Arno Kompatscher.
Interreg V-A Talia-Austria é implü le sú program de cooperaziun europeica che sostëgn les politiches de svilup local de forma partezipativa (dal inom CLLD) lauran fora proiec adöm ala popolaziun locala ti prozesc de dezijiun por le dagní de nosc teritore. L’Interreg V ará a desposiziun indöt ressurses por 98 miliuns de euro cina l’ann 2020, de chisc vëgnel 82 miliuns de euro dal Fonds europeich de svilup regional. La pert che resta vëgn finanziada dal Stat.
Le start ofizial dla perioda nöia de programaziun, spliga Peter Gamper, le diretur dl Ofize Integraziun europeica y responsabl dl’autorité aministrativa Interreg V-A Talia Austria, „sará en jöbia ai 28 de jená dl 2015 a Balsan cun na presentaiun ofiziala di contignüs dl program 2020, les strategies de cooperaziun y les condiziuns por la presentaziun di proiec y por l’amisciun dl finanziamënt.“ Le pröm call de presentaziun di proiec é gnü stabilí por mez forá. Por informaziuns plü monüdes prëibel vijité: www.interreg.net/
rc
