Ortografia nöia: 150 porsones dl monn scolastich ajornëia sües conescënzes
La scemplificaziun dl’ortografia dl ladin scrit dla Val Badia é gnüda aproada de merz dl 2015. Ti ultims mëisc á indöt 150 insegnanc y insegnantes dles scores y scolines dla Val Badia tut pert a cursc d’ajornamënt che reverda les regoles ortografiches nöies. „N sëgn che l’interes é gran y che la reforma vá tl dërt vers“, insciö l’assessur Mussner.
La resposta da pert dl monn dla scora é stada grana. Cun la reforma de scemplificaziun dl ladin scrit dla Val Badia él gnü a se le dé de plü mudaziuns ortografiches tla manira da scrí che mëss sëgn ince gní adorades vare por vare tles ores d’insegnamënt de ladin te scora. Por alisiré le passaje ala forma da scrí nöia él preodü na perioda de transiziun de trëi agn cina merz dl 2018. Intratan á le Ciamp Inovaziun y Consulënza, adöm cun l’Istitut Ladin Micura de Rü, publiché n codejel cun les informaziuns plü importantes y les regoles nöies da consulté ince online. Implü él gnü organisé dal Ciamp Inovaziun y Consulënza dl Departimënt Educaziun y Cultura ladina 7 cursc d’ajornamënt cun l’esperta linguistica Daria Valentin por dötes les insegnantes y educadësses che laora tles scores y scolines dla Val Badia.
Passa 150 porsones dl monn dla scora y dla scolina á tut pert ai cursc organisá tratan l’ann 2015. „Chësc numer alt desmostra che l’interes da pert dl monn dla scora é gran. La scemplificaziun dla manira da scrí dess ester n aiüt concret por che plü porsones scries y se dais jö cun le ladin. N obietif, che i sun bele stá bogn d'arjunje en pert, cun la buna presënza de insegnanc ai cursc desvalis“, insciö l’assessur por la scora y cultura ladina Florian Mussner. Ince l’intendënt Roland Verra recorda che la convenziun „é bëgnodüda, deache ara dëida da porté le ladin plü dlungia al’utënza y á descedé l’interes da adoré de plü le ladin te forma scrita. Porchël fejel ince gran plajëi da odëi la buna partezipaziun ai cursc y chësc é na buna basa por l’azetanza dles mudaziuns ince por le bëgn de nosc lingaz.“
Le presidënt dl Istitut Ladin Micura de Rü Albert Videsott sotlignëia che, „les regoles dl'ortografia é te vigni lingaz n compromis danter de plü esigënzes. Te n monn che vá tres plü debota se tol la reforma dl'ortografia dant da scemplifiché le scrí por ladin y da ti dé ales generaziuns nöies na massaria por adoré le lingaz te manira direta y spontana." Ince le diretur dl Ciamp Inovaziun y Consulënza Felix Ploner é contënt de chësc vare por alisiré l’aprendimënt dles regoles nöies, ince por mirit dla profescionalité dla reladëssa: "Por chisc cursc de ladin unse ciafé, tres le Sorvisc de Formaziun, l’esperta de lingaz ladin Daria Valentin, che á tut sö cun savëi chësta inciaria y che i rengrazi por süa colaboraziun da daidé le monn dla scora ladina".
Daria Valentin spliga che „la maiú pert dles partezipantes ê corioses de odëi plü tl menü ci che al ê gnü scemplifiché. Sce an ti ciara avisa ales regoles reformades s’intënon atira che al ne s’á pa nia mudé cis tröp. Les chestiuns prinzipales ne reverda nia d’ater co i azënc.“ Tratan le curs á dötes les partezipantes y düc i partezipanc albü la ocajiun da se confronté cun chësc aspet y á podü odëi ite che vigni abitant dla Val Badia mëss se sposté n püch por ti jí adincuntra a so vijin. „Un di gragn vantaji dla reforma é che an ne mëss nia plü se spaché le ce sön i azënc daverc o stlüc, y che an ne mëss nia plü chirí sön la tastadöra i azënc sön le C y sön le S. Ince sce al é jü a perde a chësta manira n valgönes carateristiches che ti dê denant na saú plü sterscia al cëi ladin sarál poscibl da se lié ciamó deplü danter n paisc y l’ater y le vare é dessigü sté le dërt“, insciö Daria Valentin inant. De plü informaziuns sön i cursc che gnará tignis ti mëisc da d’aisciöda ciafëise da Mathias Stuflesser dl Sorvisc de Formaziun (tel. 0471 417031) y sön le sit pedagogich.it
Intratan á l’Istitut ladin Micura de Rü ajorné ince le vocabolar online Todësch – Ladin Val Badia cun l’ortografia nöia che pó gní consulté sot a: http://www.micura.it/la/dizionars/vb/dl.
rc
Galaria dales fotografies
