Avalianza de jëne: plann y mosöres dla Provinzia por smendrí la desfarënzia
Sura dui terzi di dependënc provinziai é ëres, mo che davagna sciöche valur mesan 3,8 porcënt de manco di ëi y che á ma un n terzo dles posiziuns de direziun. Chisc dac é le resultat de n stüde dl Ofize organisaziun presenté incö (ai 3 de dezëmber) a Balsan. Por le pröm iade á la Provinzia realisé n plann por l’avalianza de jëne dl personal tl'Aministraziun provinziala cun mosöres concretes.
Le stüde, realisé sön la basa dla lege provinziala 5/2010 sön l’avalianza y la promoziun dles ëres, é gnü fat dal Ofize organisaziun en acordanza cun l’aconsiadëssa por l’avalianza Michela Morandini y la Repartiziun Personal dla Provinzia. I resultac, che é gnüs presentá incö (ai 3 de dezëmber) dal’assessuria por le personal Waltraud Deeg y dal diretur general Hanspeter Staffler cun l’aconsidëssa Morandini, nes dij che: le 68,4 porcënt di dependënc provinziai é ëres, che danter l’ann 2000 cina l’ann 2014 é la cuota rosa dl’aministraziun provinziala chersciüda de prësc 6 porcënt y che ma plü le 54 porcënt dles ëres laora part time cuntra le 12,9 porcënt di ëi. „Le laur part time y de conseguënza la penalisaziun dla cariera porta para por le ëres n davagn plü pice y insciö ince na ponsiun limitada“, á dit Deeg. Por l'assessuria sará un di compic prinzipai dl dagní da „svilupé conzec de laur che se adatëia tres deplü ai bojëgns dles families y di daturs de laur por ti pormët ince ai peri da tó pert al laur d’eduaziun y cura di mituns“.
I compic d’educaziun ti vëgn tres de plü surandá ales ëres, á sotligné Morandini, y chësc de conseguënza archita dla cariera dles ëres. Les zifres dij che tles posiziuns de direziun él tres ciamó da ciafé na porcentuala dër alta de ëi. Sön 10 dirigënc é ma trëi ëres. La situaziun s’é miorada ti ultims agn, á dit Morandini: dal 2000 é le numer dles ëres te posiziuns de direziun deventada dopl tan grana passan dal 16 al 33 porcënt. N’atra desfarënzia reverda ince i paiamënc, cun i ëi che davagna sciöche valur mesan 3,8 procënt deplü en confrunt dles ëres.
Por le pröm iade á la Provinzia presenté chësc ann ince n plann d’aziun cun intervënc y mosöres concretes de sostëgn al’avalianza de jëne. „N valgügn vari importanc é bele gnüs fac – á ajunté Michela Morandini – mo la strada da fá por arjunje na parité valia é ciamó lungia.“ Le plann d’aziun dla Provinzia reverda cater arees d’intervënt: les posiziuns di dirigënc, les retribuziuns por maternité y paternité, la segregaziun profescionala y conzec de laur alternatifs. Cina l’ann 2020 él preodü l’atuaziun de na seria de mosöres che pëia ia dala reorganisaziun di dirigënc y da na mudaziun „culturala“ por ti pormët a plü ëres da ester tles posiziuns plü altes dl’aministraziun. Implü él ince preodü n’incentivaziun dles retribuziuns por i peri tres n’informaziun detaiada y la colaboraziun dl’Agenzia por la familia, le mioramënt dl’orientamënt profescional por aumenté la presënza de ëi tl setur dl’istruziun y le svilup de conzec alternatifs.
„Dal’aprovaziun dla lege sön l’avalianza dl 2010 – á ajunté l’assessuria por l’avalianza dles oportunités Martha Stocker – él gnü fat tröc vari, ma al resta ciamó tröp da fá ince por ci che reverda la presënza de ëres te posiziuns de direziun. Al se trata de na tematica dër atuala, sön chëra che al gnará lauré cun proiec y programs aposta.“
rc
