Evënt leterar te trëi lingac por festejé le De dla munt ai 11/12 a Balsan
En vëndres, ai 11 de dezëmber organisëia la sënta destacada dl Secretariat dla Convenziun dles Alpes tl Museion a Balsan, pian ia dales 19, l’evënt leterar “Leggere le Montagne, Berge Lesen, Lì les muntes” en ocajiun dl De internazional dla munt, en colaboraziun cun les trëi Repartiziuns por la Cultura y cun la seziun de Balsan dl CAI y dl Alpenverein. Ala pert ince l'auturia Rut Bernardi.
Chësc avenimënt organisé a Balsan alda pro i termins leterars sostignis y organisá le medemo de te passa caranta posć dl raiun alpin che toca pro la Convenziun dles Alpes.
L’idea da festejé le De dla munt cun na seria d’incuntades sön la leteratöra alpina é gnüda sostignida dala Presidënza da sëgn dla Convenziun dles Alpes surantuta al momënt dai Paîsc Todësc y ó valorisé la dimenjiun culturala alpina, incorajan les porsones da lí y conësce les munts ince da chësc punt d’odüda nia convenzional.
L’evënt gnará tigní en vëndres, ai 11 de dezëmber, dales 19:00 inant tl Museion (Balsan) y al tolará pert trëi auturs Antonella Fornari, Jörg Zemmler y Rut Bernardi, che se baratará jö da lí y cunté plates fora de sües operes scrites por ladin, talian y todësch.
Les letöres gnará acompagnades dala usc dla ciantarina da Balsan Greta Marcolongo, che interpretará les musighes y les cianties dla tradiziun da munt taliana y ladina, y dai Opas Diandl che portará dant toc musicai dla tradiziun da munt todëscia. La moderaziun vëgn surantuta da Cornelia Dell’Eva.
Por sotrissé la belëza dla contrada da munt dl Südtirol cun sües pizes, so florí de sorëdl, sües beliscimes contrades, gnarál proieté tratan la sëra tl salf les fotografies de Alessandro Gruzza y Georg Tappeiner.
L’evënt por festejé le De internazional dla munt é davert a düc y se stlujará jö cun na viva y na cërcia de produc locai dl Südtirol.
Al vëgn perié bel che che tol pert da se scrí ite chiló: https://goo.gl/MlLmh3
Por de plü informaziuns ciaré sön le sit www.alpconv.org
Por de plü informaziuns contaté: Giulia Gaggia, Secreteria permanënta dla Convenziun dles Alpes, Tel: 0471 055352, e-mail: giulia.gaggia@alpconv.org
rc
