Open data Südtirol: la porta digitala ales aministraziuns publiches
I dac dles aministraziuns publiches tl Südtirol é sëgn azessibli te na forma unitara y pó gní adora tres n sistem digital. Incö (ai 9 de dezëmber) á l’assessuria por l’informatica Waltraud Deeg presenté le portal nü Open data Südtirol, olache düc i ënc publics mët a desposiziun les informaziuns che pó gní adorades da istituziuns y zitadins.
I Open Government Data é informaziuns realisades, racoiüdes o surantutes da ënc publics che pó gní adorades y spartides tl interes dla coletivité. Le plann strategich de svilup digital „Südtirol digital 2020“ aprové da püch dala Junta provinziala prevëiga la creaziun de n portal davert cun les informaziuns dles aministraziuns publiches, n portal Open Data, che é bele online y che é gnü presenté incö (ai 09/12) tl Palaz Widmann dal’assessuria Waltraud Deeg, dal diretur dla Repartiziun Informtaica Kurt Pöhl y dal vizediretur general dla SIAG Alfredo Iellici.
„Cun l’azes diret a chisc dac sarál meso da alisiré la comunicaziun dles informaziuns, da favorí la partezipaziun democratica y da promöie ativités d’archirida y de svilup, da cherié trasparënza y confidënza tl’aministraziun publica y da mioré insciö ince la cualité di sorvisc“, á splighé l’assessuria Deeg. Implü sarál poscibl cun le portal da evité cosć por l’aministraziun, da ajorné tresfora la cualité di dac y da sparagné ressurses por merit de n azes scemplifiché. Le portal Open data é n proiet important, „cun na seria de mosöres por manajé l’Aministraziun publica te na manira plü moderna y dlungia ai zitadins.“
Le portal Open data pita atualmënter ince l'azes a 250 dataset: „Al se trata de n punt de racoiüda digitala che pita l’azes a düc i dac publicá sciöche Open data dales aministraziuns publiches dl Südtirol“, á splighé le diretur Pöhl. Atualmënter é i partner che fej pert dl proiet l’Aministraziun provinziala, la SASA, la Regiun Trentin Südtirol y l’Eurac Research. I dac, debann y realisá cun la plataforma open source, pó gní adorá da zitadins, organisaziuns no profit, imprejes y atres aministraziuns publiches. I 250 dataset pormët implü de adoré dac geografics (por ejëmpl planns urbanistics), de mobilité (orars di mesi de trasport), de statistiches (indesc di prisc), dla cultura (museums), dles eleziuns (provinziales y comunales). Le portal open data nü gnará ajorné tresfora. „La cuantité di dataset messará gní aumentada adöm cun les impreses locales y tres la sensibilisaziun di ënc publics da mené inant i dac te na forma adatada“, á ajunté le vizediretur Iellici, che á svilupé le portal cun i tecnics dla SIAG.
Al é implü preodü la colaboraziun cun la Provinzia de Trënt por ti garantí al personal provinzial la formaziun sön i open data y al é ince en previjiun la valutaziun de n’assoziaziun di portai dles döes Provinzies autonomes. En contlujiun á l’assessuria Deeg ince recordé che d’isté él gnü formé le „Governance Board“ che é tl lauré fora n plann trienal por le svilup unitar dl setur publich dl’IT. „Te na perioda tres plü digitala é la desponibilité di dac un di fauturs de atrativité de n teritore, al deura poscibilités de marce nöies por les impreses y de conseguënza vëgnel ince aumenté la competitivité de döt le raiun“, á stlüt jö Deeg.
Le portal open data é azessibl ala misciun: http://dati.retecivica.bz.it/it/
rc
Galaria dales fotografies
